Ռուսաստանի համար այդ ամենը բուտաֆորիա է
ՔԱՂԱՔԱԿԱՆՈՒԹՅՈՒՆ
ՌԴ ԱԳՆ ներկայացուցիչ Զապարովան հայտարարել է, որ ռուսական կողմը պատրաստ է մի շարք փաստաթղթեր որոնք կարող են Հայաստանի և Ադրբեջանի սահմանի սահմանազատման և սահմանագծման հարցերի քննարկումը կառուցողական դարձնել։
Այս թեմայով զրուցել ենք «Ազատ քաղաքացի» ՀԿ նախագահ Հովսեփ Խուրշուդյանի հետ։
Հարցին, թե այդ փաստաթղթերը որքանով կարող են շահեկան լինել հայկական կողմի համար` Հովսեփ Խուրշուդյանը պատասխանել է․ «Դե տեսնենք, թե ինչ փաստաթղթեր են ներկայացնելու։ Ամեն դեպքում, մինչ այժմ մենք արդեն տեսել ենք, թե Կրեմլի պատկերացմամբ «կառուցողական» եզրը ինչ ընկալում ունի։ Իրենք արդեն հայտարարել են, որ «փայլուն» օպերացիա իրականացրին Թուրքիայի հետ Արցախում։ Հիմա իրենք Ալիևի հետ «փայլուն» օպերացիա են իրականացնում հայ-ադրբեջանական սահմաններին՝ փորձելով օրինականացնել Հայաստանից նոր տարածքների զավթումը ադրբեջանական զինուժի կողմից, ինչը տեղի ունեցավ նաև ռազմական դիմադրություն ցույց չտալու և «խնդիրը խաղաղ կարգավորելու» ռուսական պարտադրանքի, ապաև Հայաստանի՝ ՄԱԿ-ի անվտանգության խորհուրդ դիմելու վրա դրված Կրեմլի արգելքի պայմաններում։ Իրենց կառուցողականն այն է, երբ անգամ չդատապարտեցին այդ ներխուժումը, թեև իրենք լավ գիտեին, որ ադրբեջանցիների ներկայացված քարտեզները կեղծ էին։ Իրենց «կառուցողականը» Ալիևի ձեռքից կերակրվող գեներալ Մուրադովն է, որը ամբողջությամբ սպասարկում է Արցախում Ադրբեջանի շահերը։ Հայաստանին սահմանազատման հարցում սեփական շահերը պաշտպանելու համար անհրաժեշտ է հիմնվել ոչ թե ռուսական կողմի փաստաթղթերի, ինչպիսիք էլ որ դրանք լինեն, այլ միջազգային իրավունքի և սահմանների սահմանազատման լավագույն եվրոպական փորձի վրա, որը ամրագրված է ԵԱՀԿ համապատասխան թեմատիկ ձեռնարկներում։ Օրինակ, միջազգային իրավունքի տեսանկյունից սահմանազատման ընթացքում պետք է պաշտպանվեն տեղի բնակչության քաղաքացիական, տնտեսական շահերը, իրավունքները։ Նաև էական նշանակություն ունեն սահմանների պատմա-իրավական հիմքերը։ Ռուսաստանի համար այդ ամենը բուտաֆորիա է և գոյություն ունեն միայն Ռուսաստանի կայսերապաշտական շահերը, որոնք այս պահին, ըստ Կրեմլում նստած կլեպտոկրատիայի, համընկնում են Ադրբեջանի շահերի հետ։ Շառլ Միշելի առաջարկը՝ տրամադրել փորձագետների սահմանազատման հարցում, չի կարելի օդում թողնել։ Անհրաժեշտ է արձագանքել դրան։ Թող Ադրբեջա՛նը մերժի»։
Սոնա Գիշյան
