Մարդիկ պետք է գիտակցեն պատվաստվելու կարևորությունը
ՔԱՂԱՔԱԿԱՆՈՒԹՅՈՒՆ
Առողջապահության նախարարության նոր նախաձեռնությամբ է հանդես եկել, ըստ որի կորոնավիրուսի դեմ պատվաստվել ցանկացողներին վիճակահանության միջոցով թատրոնի կամ կինոյի տոմսեր են տրամադրելու։ Այս կերպ նախարարությունը փորձում է խթանել պատվաստվողների քանակի ավելացմանը։
Այս թեմայով զրուցել ենք առողջապահության նախկին նախարար Արարատ Մկրտչյանի հետ։
Անդրադառնալով նախարարության ձեռնարկած նախաձեռնությանը` Արարատ Մկրտչյանը ասել է, որ մարդկանց մտքով անցել է պատվաստումը խթանող միջոց կիրառել, դա են որոշել․ «Կհանդիսանա՞ խթան, թե՞ ոչ՝ չեմ կարող ասել, սպասել է պետք։ Բայց այս որոշման մեջ զավեշտալի կամ արտառոց ոչինչ չեմ տեսնում։ Հայաստանում պատվաստումների վերաբերյալ իրազեկումը ճիշտ է իրականացվել ու իրականացվում, իսկ պատվաստումների դեմ տարվող հակաքարոզչություն եղել է դեռ խորհրդային տարիներից, որը, իհարկե, ազդում է հասարակական կարծիքի վրա։ Պատվաստումները սկսվել են մոտ 6 ամիս առաջ և դրա հիման վրա եզրակացություն անել, թե Հայաստանում պատվաստվողների պասիվություն է նկատվում, սխալ է։ Ես չեմ ընդունում այն երկրների վարքագիծը, որոնք պատվաստումների ընդգրկումը մեծացնելու համար դիմում են որոշակի միջոցների, որոնք պարտադրանքի բնույթ են կրում, իսկ ցանկացած պատվաստում պարտադիր անել ընդունելի չէ և հակասում է ժողովրդավարությանը»։
Առողջապահության նախկին նախարարի խոսքով ով էլ այս ընթացքում նախարար լիներ, չէր կարող այնպես անել, որ պատվաստվողների թիվն ավելի շատ լիներ, քան կա, որովհետև ցանկացած պատվաստում ենթադրում է որոշակի ժամանակ։ Մարդիկ, նախևառաջ իրենց մեջ պետք է հաղթահարեն այդ «վախերը» և գիտակցեն պատվաստվելու կարևորությունը։
Սոնա Գիշյան
