Ինչպե՞ս Փաշինյանը խաղից դուրս թողեց սեփական թիմի երկու առաջատար դեմքերի
ՎԵՐԼՈՒԾՈՒԹՅՈՒՆՆԵՐ
Հայաստանի փոխվարչապետ Տիգրան Ավինյանը նոր կառավարությունում պաշտոն չի ունենա։ Ազգային ժողովի նախագահ Արարատ Միրզոյանի ճակատագիրն էլ դեռ անորոշ է։ Թեպետ օրեր շարունակ մամուլը գրում էր, որ նրան բաժին կհասնի Անվտանգության խորհրդի քարտուղարի պաշտոնը, երեկ ԱԺ նախագահի պաշտոնի հավակնորդ Ալեն Սիմոնյանի հայտարարությունները, կարծես, հակառակն են ապացուցում։ «Քաղաքացիական պայմանագիր» կուսակցության գրասենյակում երեկ տեղի է ունեցել Նիկոլ Փաշինյանի և նորընտիր պատգամավորների առաջին հանդիպումը, որից հետո Ալեն Սիմոնյանը ճեպազրույց է ունեցել լրագրողների հետ և ծաղրելով հայտարարել, թե Արարատ Միրզոյանն ու Տիգրան Ավինյանն իրենց հետագա գործունեությունը կշարունակեն որպես ՔՊ-ի ակտիվ կուսակիցներ։
«Թե՛ Արարատ Միրզոյանը, թե՛ Տիգրան Ավինյանը ՔՊ հիմնադիր անդամներ են, շարունակելու են իրենց գործունեությունը ՔՊ-ի վարչությունում՝ որպես ակտիվ կուսակից»,- հայտարարել է Ալեն Սիմոնյանը:
2018թ․ այսպես կոչված «հեղափոխությունից» հետո Արարատ Միրզոյանը նշանակվեց առաջին փոխվարչապետ, իսկ Ավինյանը՝ փոխվարչապետ։ Մյուս փոխվարչապետի պաշտոնը բաժին հասավ ԲՀԿ-ին՝ ի դեմս Մհեր Գրիգորյանի։ Խորհրդարանական ընտրություններից հետո արդեն Արարատ Միրզոյանը խորհրդարանական կառավարմամբ երկրի երկրորդ դեմքն էր, իսկ Տիգրան Ավինյանը՝ երկրորդ մարդը կառավարությունում Նիկոլ Փաշինյանից հետո։ Փաստացի այժմ նրանք երկուսն էլ մնացել են խաղից դուրս վիճակում, կորցրել են ոչ միայն քաղաքական կշիռը, այլև ունեցած ազդեցությունը։ Արարատ Միրզոյանը օրեր առաջ հրաժարվեց պատգամավորի մանդատից։ Այս առումով իրատեսական են թվում այն կանխատեսումները, թե այդ երկու գործիչները կարող են լքել իշխող թիմը և թռնել Նիկոլ Փաշինյանի կողքից, իրենց ձեռքերը լվանալ պարտության պատասխանատվությունից։ Այսօր դեռ բարդ է ասել՝ երկու առանցքային դեմքերին խաղից դուրս թողնելը Փաշինյանի՞, թե՞ հենց իրենց նախաձեռնությունն էր։ Ինքը՝ Փաշինյանը այս փոփոխությունից առանձնապես չի տուժում։
Արարատ Միրզոյանին կփոխարինի Ալեն Սիմոնյանը, ինչը, իհարկե, ծաղր է պառլամենտարիզմի համար։ Փոխարենը կառավարական ամառանոցներում Նիկոլ Փաշինյանը Միրզոյանի փոխարեն կունենա Ալեն Սիմոնյան անունով հարևան։ Ավինյանի փոխարեն էլ կնշանակվի Սուրեն Պապիկյանը, որը կշարունակի ասֆալտ անելով ապահովել սեփական PR-արշավը։ Փոխարենը մտածելու լուրջ առիթ ունեն «Քաղաքացիական պայմանագրի» անդամները։ Եթե Նիկոլ Փաշինյանն այսքան հեշտ ազատվում է իր մերձավոր զինակիցներից, ապա նույն հաջողությամբ կազատվի յուրաքանչյուրից։
Լևոն Առաքելյան
