Նիկոլ Փաշինյանի իշխանության իրական դեմքը «շիշբռնողներն» են

Ընդդիմադիր Նիկոլ Փաշինյանն առիթը բաց չէր թողնում՝ քննադատելու նախկին իշխանությունների որոշ ներկայացուցիչների ցոփ ու շվայտ կյանքը, խրախճանքները, հարսանիքների վրա արված ահռելի ծախսերը, քրեական տարրերի հետ սեղան նստելը, այլ արատավոր բարքերը։ 2018թ․ իշխանափոխությունից հետո իշխանություն դարձած Նիկոլ Փաշինյանի և նրա թիմի վարքն ապացուցեց, որ իրենք նույն այդ արատավոր արժեքների կրողն են, մի բան էլ ավելի վատ։ Իսկ քննադատում էին նախկիններին, քանի որ իրենք էլ էին ցանկանում վայելել կյանքի այդ դրվագները։ Շաբաթ օրը Երևանի ամենաթանկարժեք ռեստորանում 500 հոգու մասնակցության կայացած հարսանիքը դեռ երկար է քննարկվելու հանրության շրջանում։ Փեսան փաշինյանական իշխանության ամենահայտնի դեմքերից մեկն է՝ «Շիշ բռնող» մականունով Հայկ Սարգսյանը։ Իսկ հարսանիքին մասնակցել է իշխանական ողջ էլիտան՝ Նիկոլ Փաշինյանի գլխավորությամբ, նաև նոր իշխանության հենարան քրեական տարրերը։

Զարմանալի կլիներ, եթե այդ խառնամբոխը չզվարճանար թուրքական մուղամի հնչյունների ներքո, իսկ տորթը չգերազանցեր նույնիսկ Հայաստանի պաշտոնապես ամենահարուստ մարդու՝ Գագիկ Ծառուկյանի որդու հարսանիքի տորթին։ Հարսանեկան արարողությանը երգել են Թաթուլ Ավոյանը, Թաթա Սիմոնյանը, Իվետա Մուկուչյանը և այլ հայտնի երգիչներ, որոնք աստղաբաշխական գումարներ են պահանջում ամեն ելույթի համար։ Իրավիճակի ողբերգականությունն այն է, որ փաշինյանական «էլիտան» զվարճանում է մի պայմաններում, երբ երկիրը պատերազմում խայտառակ պարտություն է կրել, տնտեսությունը գահավիժում է, իսկ երկրի սահմանները վերածվել են շփման գծի։ Փաշինյանի կողմնակիցները իրենց վրդովմունքի ձայնն էին բարձրացնում Ծառուկյանի որդու հարսանիքի ժամանակ, իսկ այսօր, երկրակի ստանդարտներով առաջնորդվելով, բառ անգամ չեն խոսում իշխանական պատգամավորի ցոփ արարողության մասին։ Նիկոլ Փաշինյանի իշխանությունը ժամ առ ժամ ապացուցում է, որ օրգանական որևէ կապ չունի այս երկրի, պետության, ժողովրդի, ազգային մտածելակերպի հետ։ Այն ոչ պակաս քրեական է, քրեածին, իսկ վսեմ կարգախոսներով իշխանության են եկել միայն բարիքներից օգտվելու համար։

Տարոն Գաբրիելյան