Ադրբեջանը վերջնականապես ուզում է թաղել արցախյան հարցը

Սահմանային սրացումներով, Հայաստանի հետ սահմանը շփման գիծ դարձնելով՝ Ադրբեջանը երկու կարևորագույն խնդիր է ցանկանում լուծել։ Առաջինը՝ տրանսպորտային միջանցքների պահանջն է, և երկրորդը՝ արցախյան հարցի վերջնական լուծումը հօգուտ Ադրբեջանի։ Գաղտնիք չէ, որ ԵԱՀԿ Մինսկի խմբի համանախագահող երկրները այնքան էլ համաձայն չեն հարցի այսպիսի լուծման հետ։ Տարածաշրջանում անկայունության պահպանումը բխում է թե՛ Ռուսաստանի, թե՛ Արևմուտքի շահերից, և միայն այդ դեպքում նրանք շանս կունենան պահպանել իրենց ազդեցությունը Հայաստանի և Ադրբեջանի վրա։ Իսկ հարցի այսպիսի լուծումը հղի է լուրջ վտանգներով գերտերությունների համար։ Ադրբեջանի արտգործնախարար Ջեյհուն Բայրամովը նախօրեին հայտարարել է, թե պաշտոնական Երևանը չի արձագանքում խաղաղ համաձայնագրի կնքման՝ Բաքվից հնչող կոչերին։

Բայրամովի խոսքով. «Նման վերաբերմունքը հարված է տարածաշրջանում խաղաղությանն ու առաջընթացին։ Իրավիճակը ճիշտ օգտագործելու և միջազգային օրենքները պահպանելու դեպքում հնարավոր կլինի տարածաշրջանում հարատև խաղաղություն հաստատել», - հայտարարել է Ադրբեջանի արտգործնախարար Ջեյհուն Բայրամովը։

Այս հայտարարությունից պարզ է դառնում, որ Ադրբեջանը շտապում է, փորձում նեղել Նիկոլ Փաշինյանի խեղճացած իշխանությանը, որն ինքն էլ դեմ չէ ադրբեջանամետ կարգավորման տարբերակին, միայն թե կարողանա պահպանել իշխանությունը Հայաստանում։ Ըստ ամենայնի, գերտերություններն էլ են ստիպում ՀՀ իշխանություններին՝ չգնալ խնդրի նման կարգավորման։ Իսկ Ադրբեջանն այդ ընթացքում շարունակում է սրել իրավիճակը, սադրանքներ կազմակերպել սահմանի տարբեր հատվածներում։ Ալիևին դա անհրաժեշտ է թե՛ ներքին լսարանին ապացուցելու համար, որ «հաղթող» կողմը շարունակում է հաղթանակներ կերտել, թե՛ արտաքին քաղաքական առումով։ Մյուս կողմից Հայաստանի տարածքից սանտիմետր առ սանտիմետր պոկած ցանկացած կտորը, արոտավայրը, գյուղը ապագայում լուրջ ռեսուրս է Ադրբեջանի տնտեսության համար, փոխարենը տուժում է Հայաստանը, տուժում է սեփական իշխանության անողնաշար պահվածքի պատճառով։

Արմեն Հակոբյան