Քանի՞ ժամ պետք է քնի երեխան օրվա ընթացքում

Շատ նորաթուխ մայրերի անհանգստացնում է փոքրիկի քունը. երեխան մեկ չի քնում, մեկ էլ՝ քնում է չափից շատ: Իսկ ո՞րն է իրականում քնի նորմալ չափը:

Նորածինները քնում են կարճ ժամանակահատվածներով, սովորաբար՝ 30 րոպեից մինչև 4 ժամ:

Նորածինները կարող են շատ հեշտությամբ արթնանալ, օրինակ, երբ փորձում եք ձեր գրկից երեխային տեղափոխել իր անկողնու մեջ: Հեշտ արթնանալը պայմանավորված է նրանով, որ նորածինների քնի մեծ մասը «ակտիվ քուն է», որը բնութագրվում է դողացող կոպերով, արագ և անկանոն շնչառությամբ, մարմնի պատահական շարժումներով, և տարբեր ձայների արտաբերմամբ՝ տնքոցով կամ կարճ լացով:

Վերջապես, տարբեր նորածինների մոտ օրվա ընթացքում քնի ընդհանուր տևողությունը կարող է շատ տարբեր լինել: Առաջին օրերին, 24 ժամում նորածինը միջինում քնում է 16-18 ժամ, իսկ չորս շաբաթականում՝ 14 ժամ: Բայց սա հարաբերական է. կան չորս շաբաթական երեխաներ, որոնք օրական քնում են 9 ժամ, իսկ կան երեխաներ, որ քնում են 19 ժամ:

6 ամսական երեխաները մեկ օրվա ընթացքում միջինում քնում են14,5  ժամ, 1 տարեկանները՝ 13,5 ժամ:

Գիշերային քունը հաստատուն է դառնում մոտավորապես 4 ամսական հասակում և տևում է  6-8 ժամ: Աստիճանաբար երկարելով՝ 6 ամսական հասակում այն դառնում է 10-12 ժամ:

4-8 ամսական երեխաները սովորաբար ցերեկվա ընթացքում քնում են 2-3 անգամ, 9-12 ամսականները՝ 1-2 անգամ, 1-2,5 տարեկանները՝ 1: Ցերեկային քնի տևողությունը կարող է տատանվել 1-4 ժամվա սահմաններում: 2,5  տարեկանից մեծ երեխաների մեծամասնությունը  ցերեկը չի քնում, իսկ գիշերային քունն այդ տարիքում տևում է  10-15 ժամ: 4  տարեկանից մեծ երեխաները շատ հազվադեպ են ցերեկը քնում, նրանց գիշերային քունը կազմում է  9-13  ժամ:

Մինչև մեկ տարեկան հասակը երեխաների 84%-ը գիշերվա ընթացքում առնվազն մեկ անգամ արթնանում է: Նրանցից շատերը առանց ծնողների միջամտության նորից քուն են մտնում: Մյուսները քնելու համար ծնողների օգնության կարիքն ունեն և կոչվում են «գիշերն արթնացողներ»:

Սովորաբար երեխան սովորականից ավելի քիչ կամ ավելի շատ է քնում այն դեպքում, երբ հիվանդ է կամ խախտվել է օրվա ռեժիմը:

Եթե առողջ երեխան քնում է սովորականից ավելի երկար, ապա հավանական է, որ նրա մոտ առկա է՝

• մրսածություն
• դեղնախտ
• աճի կամ զարգացման խանգարում
• ոչ որակյալ քուն
• ոչ լիարժեք սնունդ է ստանում
• ստացել է պատվաստումներ

Եթե գտնում եք, որ Ձեր երեխան չափից դուրս շատ կամ քիչ է քնում, այցելեք մանկաբույժի: