Ադրբեջանն ամեն ինչ անում է, որ Հայաստանը ճանաչի Ադրբեջանի տարածքային ամբողջականությունը
ՔԱՂԱՔԱԿԱՆՈՒԹՅՈՒՆ
Արդեն մի քանի օր է, որ ադրբեջանական կողմը հայ-ադրբեջանական սահմանային երկայնքով ռազմատենչ գործողություններ է իրականացնում։ Երեկ էլ ՀՀ զինված ուժերի հակաօդային պաշտպանության ստորաբաժանումները, համապատասխան գործողություններով, կասեցրել են հայ-ադրբեջանական սահմանի հարավ-արևմտյան ուղղությամբ ԱԹՍ-ով ՀՀ օդային տարածք մուտք գործելու փորձը: ՀՀ ՊՆ փոխանցմամբ՝ հուլիսի 24-ի գիշերը և առավոտյան 09:00-ի դրությամբ իրադրությունը հայ-ադրբեջանական սահմանին, բոլոր ուղղություններով, հարաբերականորեն կայուն է:
Հայ-ադրբեջանական սահմանային լարվածության և մասին զրուցել ենք ադրբեջանագետ Գրիգորի Այվազյանի հետ։
Հարցին, թե որն է այս լարվաժության հիմնական պատճառը` ադրբեջանագետը ասել է․ «Ադրբեջանի նպատակը չի փոխվել, իսկ դա այն է, որ Հայաստանը ստորագրի պայմանագիր, որով կճանաչի Ադրբեջանի տարածքային ամբողջականությունը՝ ներառյալ Արցախի Հանրապետությունը: Սահմանին լարվածություն ստեղծելը նաև Ադրբեջանի ջղային պատասխանն է այն ուղերձների համար, որ գալիս են Մինսկի խմբից: Ալիևը տարբեր միջազգային կազմակերպությունների ներկայացուցիչների հետ հանդիպման ժամանակ շոշափում է, որ Արցախի հարցն իբրև թե փակված է, սակայն ստանում է բացասական պատասխան: Հուլիսի 20-ին էլ Մոսկվայում տեղի ունեցավ Ռուսաստանի Դաշնության նախագահ Վլադիմիր Պուտինի և Ադրբեջանի նախագահ Իլհամ Ալիևի հանդիպումը: Կրեմլի պաշտոնական կայքը հայտնեց, որ ՌԴ նախագահ Պուտինը շնորհակալություն է հայտնել Ադրբեջանի ղեկավարին տարածաշրջանային կարգավորման հարցում «փոխզիջումային լուծումներ գտնելու համար»՝ շեշտելով, որ «եթե ուզում ենք կարգավորում, ապա պետք է գնանք փոխզիջումային լուծումներ գտնելու ճանապարհով: Երկուսն էլ ասացին, որ Արցախի հակամարտության էջը փակված է, բայց տարբեր բաներ նկատի ունեին, ու տեսախցիկներից այն կողմ առանձնազրույցի ժամանակ Պուտինը ևս մեկ անգամ բացատրել է, թե ինչու է համարում, որ Արցախի հարցի ռազմական փուլը փակված է: Պատասխանը մեկն է, այնտեղ ռուսական ներկայությունն է»։
Սոնա Գիշյան
