Քիչ մարդ՝ քիչ գլխացավանք․ արտագաղթն ուժգնանում է, իշխանությունը՝ լկտիանում

Հայաստանից արտագաղթն ուժգնանում է աննախադեպ տեմպերով։ Արցախյան 44-օրյա պատերազմում կրած պարտությունը, տնտեսական և քաղաքական ծայրահեղ ծանր վիճակը չէին կարող չազդել մարդկանց տրամադրության վրա։ Այս տարվա առաջին կեսին Հայաստանից մեկնածների և ժամանածների բացասական հաշվեկշիռը կազմում է 138 հազար մարդ, ինչը վկայում է միգրացիայի լուրջ աճի մասին։ Ընդ որում, այդ թիվը միայն ավիափոխադրումների տվյալներով է, հայտնի չէ, թե այլ եղանակներով որքան անձինք են լքել Հայաստանի Հանրապետության տարածքը։ Այս տարվա առաջին չորս ամիսներին բացասական հաշվեկշիռը կազմում էր 75,8 հազար մարդ։ Մասնագետներն ահազանգում են, որ նման տեմպով տարեվերջին բացասական հաշվեկշիռը կարող է կազմել մինչև 250 հազար մարդ, ինչը պարզապես ողբերգական ցուցանիշ կլինի 2,5-ից 3 միլիոն բնակչություն ունեցող երկրի համար։ 

Գործող իշխանությունը՝ Նիկոլ Փաշինյանի գլխավորությամբ, հրաշալի հասկանում է արտագաղթի այդ տեմպերի պատճառներն ու ծավալները, սակայն այն կանխելու փոխարեն իշխանավորներն իրենց հայտարարություններով ավելի են խորացնում արտագաղթը։ Նախօրեին էլ աչքի է ընկել ՀՀ Էկոնոմիկայի նախարարի պաշտոնակատար Վահան Քերոբյանը։ Նա հայտարարել է, թե աշխատանքի սուր պահանջարկ կա շինարարության, գյուղատնտեսության, ՏՏ, մշակող արդյունաբերության, նույնիսկ տաքսու ոլորտներում։

«Հետևաբար կոչ եմ անում արտերկիր խոպանի գնացած բարեկամներին «բերման ենթարկել»՝ մեր երկիրն ամրացնելու ու զարգացնելու»,– ասել է Քերոբյանը։

Իհարկե, իշխանության սազանդարները կսկսեն աղաղակել, թե Քերոբյանը կոչ է անում վերադառնալ հայրենիք, սակայն իրականում հակառակն է։ Այնպիսի զգայուն հարցերում, ինչպիսին միգրացիան է, իշխանությունները պետք է գիտակցված և ճիշտ ընտրեն իրենց արտահայտությունները, այլապես հակառակ արդյունքը կունենան։ Իսկ միգուցե, հենց հակառակ արդյունքին՝ արտագաղթի խթանմանն էլ փորձում են հասնել փաշինյանական իշխանության ներկայացուցիչները։ 

Արտագաղթում են հիմնականում միջին դասի, ապահովված անձինք, ովքեր պատերազմից հետո ընդդիմադիր են եղել Նիկոլ Փաշինյանին, իսկ ընտրություններում արձանագրված արդյունքից հետո այլևս իմաստ չեն տեսնում երկրում մնալու։ «Քիչ մարդ՝ քիչ գլխացավանք» սկզբունքով առաջնորդվող իշխանությունն էլ ամեն կերպ խթանում է արտագաղթի տեմպերը։ Ի վերջո, թուլացած, աղքատ և խոցելի երկիրը ավելի հեշտ կլինի կառավարել ապիկարության այս բազմության համար։

Ցոլակ Զաքարյան