Ոստիկանապետության ճանապարհին․ ինչո՞ւ էին գիշերով ահաբեկում մարդկանց

Երևանը երեկ երեկոյան վերածվել էր մեծ պոլիգոնի․ հարյուրավոր ոստիկաններ փակել էին Երևան մտնող բոլոր ճանապարհները, բազմակիլոմետրանոց խցանումներ առաջացրել և խուզարկում էին անխտիր բոլոր մեքենաները։ ՀՀ ոստիկանությունը մինչ այս պահը որևէ ողջամիտ բացատրություն չի տվել իր հատուկ գործողության դրդապատճառների, խուզարկությունների արդյունքում իրականացված գործողությունների մասին։ Փոխարենը սոցիալական ցանցերում օգտատերերը գրում էին, թե աննախադեպ ստուգումներ են եղել ոչ միայն Երևան մտնող ճանապարհներին, այլև հենց քաղաքի փողոցներում։ Ոստիկաններին միացել էին նաև ԱԱԾ աշխատակիցները, տպավորություն էր, թե ինչ-որ մեկին են փնտրում։ 

Երեկոյան նույնիսկ լուրեր տարածվեցին, թե դիվերսիոն խմբի են որոնում, սակայն որևէ հստակ տեղեկություն այդպես էլ չհաղորդվեց։ Ոստիկանության լրատվական ծառայությունից տեղեկացրել էին, որ Երևանում իրականացնում է ուժեղացված ծառայություն: Այլ մանրամասներ ոստիկանությունը չի տեղեկացրել: Վերջին մեկ շաբաթում քրեական իրավիճակի սրումը, հրազենով իրականացված հանցագործությունները, քրեածին տարրերի ակտիվացումը, ըստ ամենայնի, մտահոգել էին իշխանություններին, որոնք փողոց էին հանել իրավապահ ողջ ռեսուրսը՝ այդկերպ վախի մթնոլորտ ստեղծելով քաղաքում։ 

Գաղտնիք չէ, իրավապահ համակարգի հեղինակությունը լրջորեն խաթարվել է Նիկոլ Փաշինյանի իշխանության վարած քաղաքականության հետևանքով, մարդիկ էլ ոչ միայն չեն վստահում, այլև չէին էլ վախենում ոստիկանից։ Իսկ առաջիկայում ընդդիմությունը նոր ու ուժգին ակցիաներ, բողոքի գործողություններ է խոստացել, որոնք ինչ-որ պահի կարող են վտանգել Նիկոլ Փաշինյանի խախուտ իշխանության գոյությունը։ Իսկ բռնապետության ձգտող քաղաքական ուժն առաջին հերթին պետք է մարդկանց ահաբեկի հենց ոստիկանների միջոցով, ինչի դրսևորման ականատեսն էլ դարձանք երեկ։

Ալեքսանդր Լևոնյան