Նիկոլ Փաշինյանն իրեն բնորոշ ցինիզմով ժողովրդին պատրաստում է «ցավոտ լուծումներին»

Հայաստանի գործող իշխանությունները սեփական ազգաբնակչությանը ահաբեկումների միջոցով պատրաստում են ցավոտ լուծումների՝ դրա համար օգտագործելով ադրբեջանական սադրանքները։ Վարչապետի պաշտոնակատար Նիկոլ Փաշինյանը նախօրեին ընդունել է Եվրոպական խորհրդի նախագահ Շառլ Միշելին, և համատեղ ասուլիսում հայտարարել, թե ոչ պաշտոնական աղբյուրներից ստացված տեղեկությունների համաձայն` Ադրբեջանը մտադիր է նոր ռազմական բախումներ հրահրել Արցախում և Հայաստանի հետ սահմանին։

«Հայաստանը պատրաստ է բանակցությունների վերսկսմանը, սակայն Ադրբեջանը որևէ արձագանք չի տվել, և ոչ պաշտոնական աղբյուրներից ստացած տեղեկությունների համաձայն` Ադրբեջանը մտադիր է նոր ռազմական բախումներ հրահրել Արցախում և հայ-ադրբեջանական սահմանին, ինչի արտահայտությունը մենք այսօր տեսնում ենք հայ-ադրբեջանական սահմանի Նախիջևանի հատվածում: Ադրբեջանի հրահրած միջադեպերը թույլ չեն տալիս նաև սկսել հայ-ադրբեջանական սահմանի դելիմիտացիային և դեմարկացիային ուղղված աշխատանքները, որոնց նույնպես ես մի քանի անգամ հրապարակային անդրադարձել եմ, այդ թվում՝ նախընտրական քարոզարշավի ընթացքում», - ասել է Նիկոլ Փաշինյանը:

Գրեթե նույն բանը հայկական կողմի վերաբերյալ օրեր առաջ հայտարարել էր Ադրբեջանի նախագահ Իլհամ Ալիևը։ Վերջին օրերին իրավիճակը սրվել է Երասխի ուղղությամբ, և այդ ժամանակ էլ Ալիևը հայտնել էր, թե «ոչ պաշտոնական տեղեկություններ են հասնում, որ Հայաստանը խաղաղ համաձայնագրի ստորագրմանը պատրաստ չէ»։

Ռազմական նոր բախումների հավանականության մասին խոսելով՝ տրամաբանական կլիներ, որ Փաշինյանը ջանքեր գործադրեր սահմանն ամրապնդելու, դիրքերն ամրացնելու ուղղությամբ, սակայն որևէ նման քայլ ՀՀ գործող իշխանությունների կողմից չենք տեսել։

Ըստ էության, նոր զոհերով, նոր սրմամբ փորձ է արվում հայ հանրությանը պարտադրել համակերպվել «բարդ, սուր և զգայուն հարցերի« ոչ հայանպաստ լուծման հետ։ Խորհրդարանական ընտրություններից հետո Փաշինյանը պարտադրված է կատարել իր արտաքին պատրոնների պահանջները, սակայն առանց ներքին ճնշումների, ահաբեկումների, վախի մթնոլորտի ստեղծման այդ «գործը» գլուխ չի գա։ Ուստի եվ իրականացվում է այս փնթի թատրոնը։

Ներսես Դանիելյան