Նիկոլի անձնական կրիմինալը․ ինչպե՞ս ահաբեկել սեփական երկիրը

Խորհրդարանական արտահերթ ընտրություններից հետո Հայաստանում «տարօրինակ» կերպով սրվել է քրեածին իրավիճակը, իսկ աղմկահարույց շատ դեպքերում շրջանառվում են իշխանությանը սերտ առնչություն ունեցողների անունները։ Երեկ էլ քաղաքի կենտրոնում կրակոցներ են հնչել, որից հետո ԶԼՄ-ներում հայտնվող տեղեկությունները տարակուսանքի լուրջ առիթ են դարձել։ Կրակոցները հնչել են Ամիրյան փողոցի` դեպի Սարյան հատվածում, ԱԱԾ Երևանի վարչության դիմաց: Մի քանի ԶԼՄ-ներ գրում են, թե ոստիկանության պաշտոնյայի պատկանող մի մեքենայից կրակել են մի քաղաքացու ոտքերի վրա, ապա կրակողի վարորդը վիրավորին գցել է մեքենայի բեռնախցիկը և հեռացրել դեպքի վայրից։ Կրակոցներից հետո դեպքի վայրում եղել են իրավապահները, բայց տուժողն ու կասկածյալը դեպքի վայրում չեն եղել:

Ըստ տեղեկությունների՝ կասկածյալը իշխանական մեծահարուստի որդին է: Օրեր առաջ էլ մեկ այլ դեպք տեղի էր ունեցել Գորիսում, Սյունիքի նախկին ու ներկա մարզպետների՝ Սուրեն Խաչատրյանի և Մելիքսեթ Պողոսյանի ազգականների միջև։ Ըստ մամուլի՝ Սյունիքի նախկին մարզպետ Սուրիկ Խաչատրյանի աներորդին ծանր վիճակում տեղափոխվել է Երևան, իսկ Մելիքսեթ Պողոսյանի որդուն, ով ինքնաձիգից անկանոն կրակահերթեր էր արձակել, իրավապահները չեն կարողանում հայտնաբերել։

Քրեական պատմություններով հարուստ է նաև իշխանության մեկ այլ ներկայացուցչի՝ «Շիշ բռնող» մականունով պատգամավոր Հայկ Սարգսյանի կյանքը։ Լուրեր են շրջանառվում, որ նա ոմն Ռուստամի հետ հանցախումբ է պահում, և անգամ այդ խմբին ոստիկանությունից ազատելու համար «դեբոշ» է սարքել Արաբկիրի բաժնում։ Ըստ էության, իշխանությունը գնում է ոչ թե ներքաղաքական իրավիճակի լարվածությունը պարպելու, կրքերը հանգստացնելու ճանապարհով, այլ քրեական այսպիսի պատմություններով, Հայաստանը նոր Սիցիլիա դարձնելով՝ փորձում է վախի և ահաբեկումների մթնոլորտ սերմանել հանրության մեջ, որպեսզի ավելի հեշտ կառավարի վախեցած զանգվածին։ Առաջիկայում նոր քրեական դեպքերի ականատեսը կլինենք, մի քանի դեպքով Նիկոլ Փաշինյանը չի սահմանափակվելու։

Սարգիս Մարության