Փաշինյանը ոչնչացնում է դիվանագիտական կորպուսը

Արցախյան հարցում սպասվող բարդագույն բանակցություններին ընդառաջ Նիկոլ Փաշինյանի իշխանությունը փորձում է լիովին գլխատել հայկական դիվանագիտական կորպուսը, գիտակ դիվանագետներին հեռացնել, իսկ նրանց փոխարեն նշանակել իր մերձավոր շրջապատի անփորձ և ապիկար դեմքերին։ Նախագահ Արմեն Սարգսյանը երեկ Փաշինյանի առաջարկությամբ հետ է կանչել Միացյալ Նահանգներում Հայաստանի դեսպան Վարուժան Ներսեսյանին և նրան նշանակել Մեծ Բրիտանիայում ՀՀ դեսպան։ Մեծ Բրիտանիան անշուշտ կարևոր երկիր է, որտեղ Ներսեսյանի հմտությունները պետք կգան։ Սակայն ԵԱՀԿ Մինսկի խմբի համանախագահ երկրում նոր դեսպանի թեկնածությունը պարզապես թևաթափ է անում։ Փաշինյանը մտադիր է ԱՄՆ-ում դեսպան նշանակել «Իմ քայլը» խմբակցության ղեկավար Լիլիթ Մակունցին, որի միակ արժանիքը Փաշինյանին անգլերեն սովորեցնելն է եղել, ի դեպ բավական վատ։ Դիվանագիտական հմտություններից և կրթությունից զուրկ Մակունցը նույնիսկ սեփական խմբակցության հետ չէր կարողանում յոլա գնալ, ուր մնաց՝ աշխարհի թիվ մեկ գերտերության քաղաքական գայլերի հետ յոլա գնա։

ԶԼՄ-ների տվյալներով, հետ է կանչվելու նաև ՌԴ-ում ՀՀ դեսպան Վարդան Տողանյանը։ Հանուն արդարության, նա առանձնապես չի էլ փայլել դիվանագիտական արդյունավետ աշխատանքով։ Փոխարենը Փաշինյանը իր մեկ այլ մտերիմի կնշանակի, ինչից առանձնապես չի շահի մեր դեսպանության աշխատանքը Մոսկվայում։ ԱԳՆ նախարարի և փոխնախարարների պաշտոնների հավակնորդները ևս չեն փայլում լուրջ հմտություններով, իսկ Ադրբեջանի հետ սպասվող բանակցություններում դա ևս մեկ խոչընդոտ է հայկական կողմի շահերն առաջ մղելու համար։ Թեպետ այդ դեպքում էլ Նիկոլ Փաշինյանը կարող է բարձրանալ խորհրդարանի ամբիոն և նման մի տեքստ երկնել․ «Եկեք պայմանավորվենք մի բան, որ ինչ էլ լինի՝ մենք մեզ երբեք պարտված չենք ճանաչի»։ Նախորդ նման հայտարարությունից հետո Հայաստանը ծանր պարտություն կրեց մարտի դաշտում։

Գոռ Տիգրանյան