Ի՞նչ է կատարվում ԱԳՆ-ում․ ադրբեջանական սադրանքին արձագանքում են չորս օր անց

Հայաստանի ԱԳՆ-ն ի վերջո արթնացավ և չորս օր անց որոշեց արձագանքել ադրբեջանական սադրանքին։ Օրերս Լեռնային Ղարաբաղի` Ադրբեջանի վերահսկողության տակ անցած տարածքներ Ադրբեջանի իշխանությունների կողմից կազմակերպված այցելությանը որոշ երկրների դիվանագիտական ներկայացուցիչների մասնակցության առնչությամբ Հայաստանի Արտաքին գործերի նախարարություն են հրավիրվել համապատասխան դիվանագիտական առաքելությունների ղեկավարները, որոնց բողոքի նոտա է հանձնվել։

Հիշեցնենք՝ հուլիսի 9-10-ը Ադրբեջանում հավատարմագրված 46 դեսպաններ այցելել են Շուշի, նրանց թվում չեն եղել Լեռնային Ղարաբաղի խնդրի կարգավորմամբ զբաղվող ԵԱՀԿ Մինսկի խմբի համանախագահ երկրների՝ Միացյալ Նահանգների, Ֆրանսիայի և Ռուսաստանի դեսպանները։ Ադրբեջանի նախագահ Իլհամ Ալիևի ձեռնարկած այս սադրանքին ՀՀ ԱԳՆ-ն արձագանքեց միայն հունիսի 13-ին, այն էլ՝ վերլուծաբանների և ընդդիմադիր շրջանակների բուռն վրդովմունքից հետո։ Իհարկե, այդ ամենի մեղքը միայն արտաքին քաղաքական գերատեսչությանը չէ։ Նիկոլ Փաշինյանի իշխանությունը ամեն ինչ արել է ԱԳՆ-ն գլխատելու, նրա հնարավորությունները նվազեցնելու ուղղությամբ։ Մի քանի ամիս այդ գերատեսչությունը նախարար և փոխնախարարներ չունի։ Միայն այսօր ԱԳ նախարարի առաջին տեղակալ են նշանակել՝ Անվտանգության խորհրդի քարտուղար Արմեն Գրիգորյանին։ ԶԼՄ-ներում համառ լուրեր են շրջանառվում, որ հենց նրան են նշանակելու ԱԳ նախարար, իսկ փոխվարչապետ Մհեր Գրիգորյանն ու ԱԺ նախագահ Արարատ Միրզոյանը հրաժարվել են նշանակվել նախարարի պաշտոնում։ Սորոսական բուռն անցյալ ունեցող, ԱԽ-ում իր աշխատանքը հիմնավորապես ձախողած Գրիգորյանին ԱԳ նախարար նշանակելու հանգամանքը, ըստ միջազգայնագետ Սուրեն Սարգսյանի, 100 տոկոսով համապատասխանում է տարածաշրջանային զարգացումների տրամաբանությանը:

«Տարածաշրջանում տեղի են ունենում մեծ վերադասավորումներ, իսկ Հայաստանում տեղի է ունենում գլոբալ կոնվերտացիա: Այս ամենի վերջնանպատակն է Ռուսաստանին Հայաստանից՝ հետևաբար նաև տարածաշրջանից հանել և Հարավային Կովկասի «նայող» նշանակել Թուրքիային: Չէ, ԵՄ-ն ու ԱՄՆ-ն չեն նայելու տարածաշրջանը, այլ իրենց դաշնակից Թուրքիան: Թուրքիան արդեն «նայում է» Վրաստանին (չնայած այստեղի հեղափոխությունը ԱՄՆ և ԵՄ աջակցությամբ տեղի ունեցավ) և Ադրբեջանին: Մնացել ենք մենք: Ի տարբերություն Վրաստանի և ասենք Ուկրաինայի, Ռուսաստանը Հայաստանի հետ ընդհանուր սահման չունի: Սա բարդացնելու է Ռուսաստանի գործը, հեշտացնելու Թուրքիայինը: Սա է գլոբալ պլանը և ամեն փոքր քայլ գնում է այս ճանապարհով»,- նշել է Սարգսյանը:

Տիրան Գասպարյան