Պետք է ՍԴ-ն լուծարել սահմանադրական փոփոխությունների միջոցով
ՔԱՂԱՔԱԿԱՆՈՒԹՅՈՒՆ
Չորս քաղաքական ուժեր՝ «Հայաստան» և «Պատիվ ունեմ» դաշինքները, «Զարթոնք» քաղաքական միավորն ու «Հայոց հայրենիք» կուսակցությունը տարբեր հիմքերով ընտրությունների արդյունքները վիճարկող դիմումներ են ներկայացրել ՍԴ:
Այս թեմայով զրուցել ենք փաստաբան Նորայր Նորիկյանի հետ։
Հարցին, թե արդյոք կարող ենք վստահ լինել որ ներկա կազմով ՍԴ-ն կկայացնի իրավական, այլ ոչ քաղաքական որոշում` փաստաբանը պատասխանել է․ «Ես երկու տարի շարունակ միշտ ասել եմ, որ այս Սահմանադրական դատարանը ընդհանրապես պետք է լուծարել: «Արդար Հայաստան» կուսակցության նախընտրական ծրագրում էլ կա, որ պետք է ՍԴ-ն լուծարել սահմանադրական փոփոխությունների միջոցով: Պետք է ստեղծել նոր Վճռաբեկ դատարան, որի մի ատյանը կլինի սահմանադրական արդարադատություն իրականացնող պալատ: Ես գտնում եմ, որ այս ՍԴ-ն իր հիմնադրման օրվանից ուղղակիորեն, ցավոք սրտի, չի իրականացրել այն առաքելությունը, որի համար կոչված է:»
Անդրադառնալով այն հարցին, թե ապօրինի գույքի բռնագանձման համար Հայաստանը ճիշտ ճանապարհով է գնում փաստաբանը պատասխանել է․ «Կյանքը ցույց կտա, թե ինչ արդյունքներ կունենանք: Ակնհայտ է, որ որոշակի սպասելիքներ կան այդ օրենքի կիրառումից: Պետք է տեսնենք, հասկանանք, թե ինչ արդյունքներ կլինեն: Քանի դեռ վերջնական արդյունք չկա, կարելի է խոսել թվերից, աղմուկից, հասարակական հնչողությունից, բայց ինձ հետաքրքրում է արդյունքը: Եթե կլինի արդյունք, ես ինքս կարձանագրեմ, որ արդյունք կա: Մեկը չի, երկուսը չի, անգամ 100-ը չի, բազմաթիվ այդպիսի գործեր կան և ապօրինի ծագում ունեցող գույքի բռնագանձման մասին օրենքը ընդամենը գործիքներից մեկն է: Բազմաթիվ այլ գործիքներ էլ կան, որոնք կարող են կիրառվել և որի արդյունքում օրինականությունը կվերականգնվի: Ինձ համար մենակ այս օրենքի կիրառմամբ չի պայմանավորված կոռուպցիայի դեմ համընդհանուր և անհանդուրժողական պայքարը: Ակնհայտ է, որ դեռևս որևէ հայտնի կոռուպցիոներ չի պատժվել: Եկեք սա արձանագրենք: Դեռևս որևէ կոռուպցիոներ կոռուպցիոն բնույթի հանցագործությունների համար նախատեսված քրեական օրենսգրքով արգելված արարքի համար պատասխանատվության չի ենթարկվել: Երբ մի հայտնի կոռուպցիոներ, որը ժամանակին զբաղեցրել է նախարարի, պատգամավորի, վարչապետի կամ նախագահի պաշտոն, կենթարկվի կոռուպցիոն բնույթի հանցագործությունով պատասխանատվության, այն ժամանակ կասեմ, որ Հայաստանում օրենքի առաջ հավասար են բոլորը, օրենքը գործում է բոլորի նկատմամբ և ՀՀ-ում պատասխանատվության ինստիտուտը սկսել է աշխատել:»
Սոնա Գիշյան
