Աննկուն Փաշինյանը․ ամեն գնով փորձում են քաղաքական խորհուրդ ձևավորել

Վարչապետի պաշտոնակատար Նիկոլ Փաշինյանը երեկ հանդիպել է արտախորհրդարանական շուրջ մեկ տասնյակ քաղաքական ուժերի ղեկավարների հետ և կրկին խոսք բացել քաղաքական խորհուրդ ստեղծելու մասին։

«Պետք է փորձենք մշտական գործող ֆորմատ ձևավորել իմ մասնակցությամբ և արտախորհրդարանական ուժերի ներկայացվածությամբ: Մենք սա դիտարկում ենք որպես, այսպես ասած, մեր հանրային կյանքի, քաղաքական կյանքի, տնտեսական կյանքի օրակարգային հարցերի քննարկման հարթակ ու եթե կարելի է այսպես ասել՝ մտագրոհի տեղ, որտեղ կարող ենք բոլոր հնարավոր հարցերը քննարկել»,- նշել է Նիկոլ Փաշինյանը:

Հանդիպումը բարդ է ներկայացուցչական համարել։ Մասնակցող մեկ տասնյակ կուսակցությունները խորհրդարանական ընտրություններում չնչին տոկոսներ են հավաքել, իսկ դրանց առաջնորդների հավակնությունները չափավոր գնահատելն անհնար է։ Փաշինյանի հետ հանդիպմանը չեն մասնակցել «Քաղաքացու որոշում», «Հանուն Հանրապետության», «Բարգավաճ Հայաստան» կուսակցությունները, իսկ Արամ Սարգսյանն ու Էդմոն Մարուքյանը, Փաշինյանի խոսքով, հանրապետությունում չեն եղել, որ մասնակցեն։ Թեպետ արդեն գրել էինք, որ այս խորհուրդն իրականություն դառնալու որևէ շանս չունի, սակայն Փաշինյանը չի հանձնվում, փորձում է ամեն գնով կայացնել, դրա համար իրար գլխի է հավաքում տարբեր գաղափարախոսություն ու կողմնորոշումներ ունեցող միավորների։ Այդ հանգամանքը զարմացրել է նույնիսկ Փաշինյանի կողմնակից գործիչներին։

«Հանուն Հանրապետության» կուսակցության նախագահ Արման Բաբաջանյանը, օրինակ, հրաժարվել է մասնակցել այդ հանդիպմանը, ասել, որ այդ նախաձեռնությունը ձևական է, նպատակ է հետապնդում միայն տեսարաններ ապահովել, և գաղափարական հենք չունենալու պատճառով անգործունակ է։

Կարեն Ջաղինյան