Նախկինում վարչական ռեսուրսի չարաշահումը նման ծավալով չի եղել
ՔԱՂԱՔԱԿԱՆՈՒԹՅՈՒՆ
«Հայաստան» դաշինքի ներկայացուցիչ, փաստաբան Արամ Վարդևանյանը Սահմանադրական դատարանում ներկայացնում է դաշինքի դիմումը՝ ԱԺ արտահերթ ընտրությունների արդյունքները վիճարկելու վերաբերյալ։ Նա անդրադարձավ նախընտրական քարոզարշավի ընթացքում վարչապետի պաշտոնակատար Նիկոլ Փաշինյանի հռետորաբանությանն ու հնչեցրած հայտարարություններին։ Արամ Վարդևանյանը ներողություն խնդրեց ու ՍԴ-ում հնչեցրեց Նիկոլ Փաշինյանի հայտարարություններից հատվածներ։ Նա նշեց, որ գործող վարչապետ Նիկոլ Փաշինյանը վարչական ռեսուրս է կիրառել նախընտրական փուլում և ընտրությունների ժամանակ։
«Ոստիկանական ուժերը, դրա վերաբերյալ կան բազմաթիվ տեսանյութեր, մշտապես «Քաղաքացիական պայմանագիր» կուսակցության վարչապետի թեկնածու, ցուցակը գլխավորող անձին ուղեկցելուց ցանկացած հանրային հավաքի ժամանակ եղել են հարյուրավոր, հազարավոր հասնող քանակի։ Մենք կարծում ենք, որ սա բնավ պատահական չի եղել, այն ունեցել է նպատակ, այսպես կոչված, սառեցնող էֆեկտ տարածելու համար հասարակության վրա։ Դա կրկին ուժի գործադրման տրամաբանության մեջ էր։ Ի վերջո նաև ուժի գործադրման տրամաբանությունը շարունակվել էր ամբողջ քարոզարշավի ընթացքում՝ ընդհուպ վերածվելով մուրճի ցուցադրման միջոցառումների։ Այս հանգամանքը ևս բարձր դատարանի կողմից պետք է գնահատականի արժանանա»։
Նա բարձրացրեց հարց՝ արդյոք նման ծավալի ոստիկանական ուժերի օգտագործումը համաչափ է եղել, թե՞ ոչ` հանրային հավաքի անվտանգությունն ապահովելու համար։ Վարդևանյանն ասաց, որ այս հարցի հստակ պատասխանը հենց ոստիկանությունը կարող է տրամադրել ՍԴ-ին։ Եվ չի բացառվում, որ իրենք նման միջնորդությամբ հանդես կգան։
Ըստ Վարդևանյանի՝ Վարչական դատարանը մարզպետարանների աշխատակիցների, կրթական հաստատության ներկայացուցիչների մասով արձանագրել է վարչական ռեսուրսի չարաշահում։ Նախընտրական հանրահավանքներին նաև վարչապետի աշխատակազմից են ներկայացուցիչներ մասնակցել։
«Երբ մենք բոլոր ասպեկտներով դիտարկում ենք վարչական ռեսուրսի չարաշահումը, դասական իմաստով բախվում ենք իրավիճակի, որ տեսնում ենք վարչապետի պաշտոնակատար, ով իբր արձակուրդ է մեկնել, բայց երթևեկում է արձակուրդում չգտնվող վարչապետի ծառայողական հնարավորություներով։ Ես այս պայմաններում, կարծում ենք, որ նախկինում վարչական ռեսուրսի չարաշահումը երբեք նման ծավալի չի եղել»,- ասաց փաստաբանը։
Նա հավելեց, որ վարչապետի հայտարարություններից հետո ՀՀ որոշ քաղաքացիներ իրական մուրճով էին գնացել Փաշինյանի հանրահավաքին:
Սոնա Գիշյան
