Հայաստանին ծանրագույն ժամանակներ են սպասվում․ Պուտինի ակնարկը

Հայաստանին ծանր ժամանակներ են սպասվում։ Հայաստանի վարչապետի պաշտոնակատար Նիկոլ Փաշինյանին ընդունելով Մոսկվայում՝ ՌԴ նախագահ Վլադիմիր Պուտինը թափանցիկ ակնարկ է արել, թե կան զգայուն հարցեր, որոնք պետք է լուծել, և դրանք լուծելու համար պետք է ունենալ ժողովրդի աջակցությունը, որը Նիկոլ Փաշինյանն ունի:

«Ցանկանում եմ արդեն անձամբ շնորհավորել Ձեզ ընտրությունների արդյունքների կապակցությամբ: Ես կարծում եմ, որ դա կարևոր է բոլորի համար, նախ և առաջ, իհարկե, Հայաստանի, հայ ժողովրդի համար՝ նկատի ունենալով, որ այնպիսի բարդ, շատ սուր և զգայուն հարցեր, որոնք պետք է լուծել, կարելի է լուծել, միայն եթե կա արդյունավետ աշխատելու հնարավորություն: Իսկ դրա համար ամենակարևորը ժողովրդի վստահությունն ունենալն է». - ասել է Վլադիմիր Պուտինը։

Քաղաքական վերլուծաբանները կարծում են, որ «ժողովրդի վստահությունը» ունեցող անձի առջև բարդ, շատ սուր և զգայուն հարցերի օրակարգ է իջեցված, որին պետք է պարտադիր լուծում տրվի։ Ուստի բոլորովին էլ զարմանալի չէր, որ խորհրդարանական արտահերթ ընտրություններում ընդդիմությունն ազդարարում էր աղաղակող ընտրակեղծիքների, տոտալ խախտումների վերաբերյալ, մինչև դիտորդական կազմակերպությունները դրական գնահատականներ էին տալիս ընտրություններին՝ մտահոգություն հայտնելով ընդամենը ագրեսիվ և հայհոյախառն հռետորաբանության շուրջ։

Ըստ երևույթին, Հարավային Կովկասում սեփական շահերը հետապնդող արտաքին ուժերին անհրաժեշտ էր բացառապես Նիկոլ Փաշինյանի վերընտրությունը, ընդ որում՝ նրան ներկայացնելով որպես ժողովրդի աջակցությունը վայելող «առաջնորդի»։ Նման ղեկավարը այլևս խուսանավելու տեղ չի ունենալու, ստիպված կլինի ստորագրել «բարդ, շատ սուր և զգայուն հարցերի» տակ։ Արցախում խայտառակ պատերազմից հետո ստեղծված իրավիճակ, Սյունիքով թշնամիներին տրանսպորտային միջանցքի տրամադրում, ՀԱՊԿ-ում և ԵԱՏՄ-ում Ադրբեջանին և թշնամաբար տրամադրված այլ պետությունների չխոչընդոտում, նավթագազային լոբբիի շահերի սպասարկում։ Սրանք «շատ սուր և զգայուն հարցերի» միայն փոքր մասն են, որ առաջիկայում դրվելու են Հայաստանի դեմ, և դրական պատասխան կարող են պոկել բացառապես պարտված և միջազգային ասպարեզում ծաղրի առարկա դարձած Փաշինյանից և այս վտանգավոր հեռանկարի մասին ահազանգում էին հատկապես նախկին նախագահները, մինչդեռ մեր հանրության մի զգալի հատվածը նախընտրեց նվաստացումը։

Արտաշես Այվազյան