Վտանգավոր զարգացումներ հայ-ադրբեջանական սահմանին

Գեղարքունիքի մարզի Վերին Շորժա գյուղի սահմանային հատվածում Ադրբեջանը երեկ փոխհրաձգություն է հրահրել: Զինված ուժերի գլխավոր շտաբի ներկայացուցիչ Սամվել Ասատրյանի խոսքով՝ հայկական կողմը ունի մեկ թեթև վիրավորում ստացած զինծառայող, իսկ ադրբեջանցիները երկու վիրավոր զինծառայող։ Մոտ երկու ամիս շարունակ ադրբեջանական զինուժը գտնվում է Սյունիքի ու Գեղարքունիքի սահմանային հատվածներում և հրաժարվում է լքել ՀՀ ինքնիշխան տարածքը։ Հայկական կողմն էլ առանձնապես ջանքեր չի գործադրում ադրբեջանական հրոսակներին Հայաստանի տարածքից դուրս վռնդելու ուղղությամբ։

Նախօրեին հայտնի դարձավ, որ Հայաստանին մերժել են նույնիսկ ՀԱՊԿ-ից, որից հետո հայկական կողմը բողոքի նոտա է փոխանցել ՀԱՊԿ-ին։ Այս ամենով հանդերձ երեկ երեկոյան մեկ այլ ուշագրավ լուր տարածվեց։ Ռուսական 102-րդ ռազմակայանի զինծառայողները ուղևորվել են Գեղարքունիքի մարզ՝ հայ-ադրբեջանական սահմանին ծառայություն իրականացնելու համար։ 90-ականներից սկսած՝ ռուսական կողմը ավանդաբար պաշտպանել է միայն Թուրքիայի հետ սահմանը, իսկ Ադրբեջանի հետ սահմանի պաշտպանությունն իրականացրել են հայկական ուժերը։ Եվ դա Հայաստանի ինքնիշխանության կարևոր փաստ էր։ Այժմ՝ երբ Հայաստանի պաշտպանության նախարարությունն ու ու ԱԱԾ-ն՝ իր սահմանապահ զորքերով չի կարողանում ապահովել ՀՀ ինքնիշխան տարածքի պաշտպանությունը Ադրբեջանից, և սահմանների ամրացումը մնում է ռուսական կողմի հայեցողության վրա, հարց է ծագում՝ ի՞նչ է անում մեր պաշտպանական գերատեսչությունն ու գերագույն հրամանատար հորջորջվող գլխավոր ծաղրածուն։

Այն, որ սահմանամերձ դարձած գյուղերի բնակիչները միայնակ են մնացել ադրբեջանցիների դեմ, մեկ անգամ չէ, որ նշել ենք։ Իշխանությունը Երևանում գեներալի կոչումներ է շնորհում, փորձում է ՊՆ-ում ազատվել անցանկալի զինվորականներին, ովքեր հրաժարվել են կատարել Փաշինյանի քաղաքական քմահաճույքները, չեն պարտադրել զինվորներին՝ ընտել Նիկոլ Փաշինյանին։ Եվ այսօր՝ ստեղծված իրավիճակում հայական կողմի վարքը ցույց է տալիս, որ զիջում են Հայաստանի ինքնիշխանությունը, այլև նորանոր զիջումներ անում Ադրբեջանին։ Դավաճանությո՞ւն է, սա․․ Իհարկե։ Որևէ կասկած լինել չի կարող։ Իսկ Փաշինյանի իշխանությունը բաց և թափանցիկ չի խոսում, չի ներկայացնում իրավիճակը։ Եթե այս զարգացումների տակ դավաճանություն չլիներ, նրանք մանրամասն և հնարավորինս բաց կխոսեին սեփական ժողովրդի հետ։

Գագիկ Միսկարյան