Մութ ամպեր դիվանագետների գլխին․ Փաշինյանը քանդում է համակարգը

Արտաքին մարտահրավերներին  դիմագրավելու փոխարեն Արտաքին գործերի նախարարությունը ջախջախելուց հետո Նիկոլ Փաշինյանի իշխանությունն այժմ էլ նոր դավադրություն է մտմտում դիվանագետների դեմ։ 
Գաղտնիք չէ, որ անկախության երեսուն տարիների ընթացքում ԱԳՆ-ն եղել է ամենապահպանողական կառույցներից մեկը, իսկ տարբեր պաշտոնների նշանակվել են դիվանագիտական ոլորտում փորձ և հմտություններ ունեցող անձինք։ Նախկին իշխանությունների օրոք, երբ դեսպանների պաշտոններում երբեմն քաղաքական նշանակումներ են արվել, դեսպանատների անձնակազմը սովորաբար բաղկացած է եղել կադրային դիվանագետներից։ 

Արտահերթ խորհրդարանական ընտրություններում էլեկտրոնային քվեարկության արդյունքները կատաղության են հասցրել Նիկոլ Փաշինյանին, ով մտադիր է ԱԳՆ կենտրոնական ապարատում զտումներ անելուց հետո հիմնովին քանդել նաև դիվանագիտական ներկայացուցչությունները։ Էլեկտրոնային եղանակով ընտրությանը մասնակցած 500 անձանցից «Քաղաքացիական պայմանագրին» կողմ էին քվեարկել միայն 163-ը։ Եվս 135-ը քվեարկել էին Ռոբերտ Քոչարյանի «Հայաստան» դաշինքի, 43-ը՝ Լևոն Տեր-Պետրոսյանի գլխավորած «Հայ ազգային կոնգրեսի» օգտին։ 

Իշխանությունները համարում են, որ արտերկրում աշխատող դիվանագետները չեն կարող սպասարկել իրենց շահերը, և ցանկանում են հետ կանչել մեծ մասին։ Փոխարենը տարբեր երկրներ դիվանագիտական ծառայության կուղարկեն սեփական կադրերին, որոնք ընդհանրապես պատկերացում չունեն դիվանագիտական աշխատանքի մասին։ 
Դիվանագետների կադրային ջարդը լուրջ խնդիրներ է հարուցելու Հայաստանի Հանրապետության համար, սակայն դա որևէ կերպ չի հուզում Նիկոլ Փաշինյանին։ Սեփական իշխանության ամրապնդման համար նա պատրաստ է քանդել առանցքային համակարգերից մեկը, և մեկ անգամ չէ, որ ապացուցել է այդ փաստը։

Գարիկ Մակարյան