Փաշինյանի վրեժը․ Հայկ Մարությանին ամեն գնով ուզում են հեռացնել

Վարչապետի պաշտոնակատար Նիկոլ Փաշինյանը որոշել է ամեն գնով պատժել Երևանի ըմբոստ քաղաքապետին։ «Քաղաքացիական պայմանագրում» տևական ժամանակ խոսակցություններ են շրջանառվում, որ Մարությանը դավաճանել է իշխանությանը, երբ հրաժարվել է աշխատել հօգուտ Փաշինյանի։ Այդ տրամադրությունները կուսակցականները փորձում են տարածել Երևանի ավագանու խմբակցության վրա, որտեղ թեև «Իմ քայլը» մեծամասնություն է, սակայն լուրջ խմորումներ կան, շատերը չեն ցանկանում քաղաքապետի հեռացումը։ Ի տարբերություն ԱԺ խմբակցության և պաշտոնյաների, որոնց հաց վաստակելու միակ հնարավորությունն իրենց պաշտոնն է, ավագանու անդամները պետությունից չնչին գումար են ստանում, և դա իրենց հիմնական աշխատանքը չէ, հեղափոխությունից հետո դարձել են ավագանու անդամներ, փորձել են սպասարկել հեղափոխական օրակարգը։

Իսկ այժմ ավագանու առավել մոլի նիկոլականները փորձում են համոզել, թե պետք է ամեն գնով հեռացնել Մարությանին և նրա փոխարեն մեկ ուրիշին նշանակել։ Այդպիսի թեկնածու «Իմ քայլում» չկա, եղած միակ թեկնածուն էլ, ում անունը տևական ժամանակ շրջանառվում էր, Շուկայի վերահսկողության տեսչական մարմնի ղեկավար Արմեն Կոտոլյանը կտրականապես հրաժարվում է դառնալ ժամանակավոր քաղաքապետ։ Կոտոլյանը չի ցանկանում անդարդ գլուխը դնել հարվածի տակ։ Հստակ հասկանում է, որ պաշտոնավարման առավելագույն ժամկետը մեկ տարին է, իսկ այդ ընթացքում թիրախ է լինելու թե՛ ընդդիմության համար, թե՛ Երևանի պաշտոնը ձեռք գցել փորձող ազդեցիկ կուսակիցների։ Այդ դեպքում իշխանությունը կարող է գնալ այլ ճանապարհով, քաղաքապետի ժամանակավոր պաշտոնակատար նշանակի։

Խոսում են փոխվարչապետ Տիգրան Ավինյանի մասին։ Նման զարգացման պարագայում Փաշինյանը ստիպված կլինի վեց ամսվա ընթացքում ավագանու նոր ընտրություններ անցկացնել։ Մեկ այլ տարբերակ էլ է քննարկվում՝ Փարաքարը միացնել Երևանին և համայնքի մեծացման կապակցությամբ նոր ընտրություններ անցկացնել։ Վերջին երկու տարբերակներն էլ ավագանու «Իմ քայլը» խմբակցության սրտով չէ, շատերը հասկանում են, որ նոր ընտրությունների դեպքում ալևս չեն կարողանա հսկա խմբակցություն ունենալ, իսկ ընտրացուցակում անցողիկ համարներում լինելու են առավել մոլի նիկոլականները։ Ուստի չափազանց բարդ է լինելու համոզել ավագանու անդամներին՝ կողմ քվեարկել Մարությանի հեռացման առաջարկին։ Եվ չնայած Երևանի քաղաքապետարանում այս զարգացումները սպառնում են դառնալ «Քաղաքացիական պայմանագրի» պառակտման պատճառ, Նիկոլ Փաշինյանը հրահանգել է ամեն գնով ազատվել Հայկ Մարությանից, որպեսզի դա դաս լինի մյուս կուսակիցների համար։

Մովսես Գասպարյան