Գումարելիների տեղափոխությունից գումարը չի փոխվում․ ՔՊ-ում կադրային սով է
ՎԵՐԼՈՒԾՈՒԹՅՈՒՆՆԵՐ
Գործող իշխանության ներսում պաշտոնների ակտիվ բաժանում է ընթանում՝ վերադասավորումներ, նշանակումներ, անտրամաբանական որոշումներ։ Իսկ «Քաղաքացիական պայմանագրում» իսկական կադրային սով է, առանցքային պաշտոնների համար նույնիսկ միջակ թեկնածուներ չկան, որակյալ մասնագետներն էլ չեն ցանկանում գործ ունենալ Նիկոլ Փաշինյանի ապիկար իշխանության հետ։ Արդյունքում, Փաշինյանը անհեթեթ փոխատեղումներ է իրականացնում, որոնք երբեմն ապշեցնում են հանրությանը։ Կորոնավիրուսի դեմ պայքարը ձախողած, ապա վարչապետի աշխատակազմում լուրջ ցնցումներ առաջացրած Արսեն Թորոսյանին գործուղում են Ազգային ժողով, իսկ վարչապետի աշխատակազմի ղեկավար նշանակել են ԿԳՄՍ նախկին նախարար Արայիկ Հարությունյանին։ Վարչապետի աշխատակազմում առանձնապես խանդավառված չեն այս որոշումից, ասում են՝ «մրից ելանք, մրջուրն ընկանք»։ Թորոսյանը լուրջ ախորժակ ուներ փոխվարչապետ դառնալու, ապա ևս ԱԺ-ում բարձր պաշտոն զբաղեցնելու, սակայն իշխանության ներսում ավելի մեծ ազդեցություն ունեցող Սուրեն Պապիկյանը, որին առաջարկվել է փոխվարչապետ դառնալ, ամեն գնով ցանկացել է ազատվել Արսեն Թորոսյանի ներկայությունից։ Փոխվարչապետ դառնալու մեծ հավակնություններ ունի նաև գործարար Խաչատուր Սուքիասյանը։
1or.am-ի աղբյուրների փոխանցմամբ՝ հատուկ նրա համար առաջին փոխվարչապետի պաշտոնն են վերականգնելու։ Իշխանությունն իր շարքերում չունի նաև ԱԳ նախարարի թեկնածու։ Փաշինյանն ամեն գնով ցանկացել է Ռուբեն Ռուբինյանին նշանակել այդ պաշտոնին, սակայն նրան մանրամասն բացատրել են, որ Ռուբինյանի նշանակումը ոչ միայն արտաքին գործընկերների, այլև սեփական կուսակցության շարքերում էլ ծաղրի առարկա կդարձնի իշխանությանը։ Կանգ են առել փոխվարչապետ Մհեր Գրիգորյանի թեկնածության վրա։ Վերջինս դեռ դիմադրում է, չի ցանկանում ստանձնել կարևոր այդ պաշտոնը, հատկապես բանակցությունների այս փուլում։ Իսկ Ռուբինյանի բուռն հավատարմությունը կփոխհատուցեն Աժ փոխնախագահ նշանակելով։ Արսեն Թորոսյանն ու ԱԺ ներկայիս նախագահ Արարատ Միրզոյանը միայն շարքային պատգամավորներ են լինելու։ Փաշինյանի համար ամենաբարդ խնդիրը ԱԺ խմբակցության ղեկավարի հարցն է։ Այդ պաշտոնում ձախողված Լիլիթ Մակունցը շուտով կմեկնի Վաշինգտոն։ Խմբակցության ղեկավար դառնալու հավակնություններով աչքի է ընկնում Հայկ Կոնջորյանը։ «Լուսավոր Հայաստանից» «Քաղաքացիական պայմանագիր» փախած Կոնջորյանի համար միջնորդում է ԱԺ նախագահի պաշտոնի հավակնորդ Ալեն Սիմոնյանը։ Բայց ՔՊ-ում դեմ են Կոնջորյանի նշանակմանը, կարծում են՝ դավաճանության փաստը ընդդիմադիրները մշտապես կարող են օգտագործել խմբակցության ղեկավարի դեմ։ ԱԺ հանձնաժողովների հարցում ևս հստակություն չկա, մի քանիսը կպահպանեն իրենց պաշտոնները, մյուսների համար դեռ քննարկումները շարունակվում են։
Արմեն Տոնոյան
