Ինչո՞ւ են Փաշինյանին կանչել Մոսկվա

Վարչապետի պաշտոնակատար Նիկոլ Փաշինյանը առաջիկա օրերին մեկնելու է Մոսկվա։ 1or.am-ն արդեն նշել է, որ Փաշինյանը հուլիսի 6-ից 7-ը գտնվելու է ՌԴ մայրաքաղաքում, որտեղ քննարկելու են եռակողմ պայմանավորվածությունների և եռակողմ փաստաթղթի իրականացման ընթացքը, կողմերը կխոսեն հայ գերիների վերադարձի հնարավորությունների, ինչպես նաև՝ Հայաստանի տարածքային անվտանգությանը վերաբերող մի շարք հարցերի շուրջ։ Այցի ամենամտահոգիչ հանգամանքը շտապողականությունն է։

Մինչ Սահմանադրական դատարանում քննարկվում է «Հայաստան» և «Պատիվ ունեմ» դաշինքների՝ ընտրությունները չեղարկելու դիմումները, խորհրդարանի նիստ չի կայանալու, ուստի Փաշինյանին դեռ չեն հաստատի վարչապետի պաշտոնում։ Այդուհանդերձ, նրան շտապ կարգով Մոսկվա կանչելը և արցախյան խնդիրը քննարկման առարկա դարձնելը վկայում է, որ Ռուսաստանը ևս շահագրգռություն ունի արագացնելու կնճիռների լուծումը և վերջնական ինչ-որ փաստաթուղթ պարտադրելու Հայաստանին։ Դա կարող է լինել կա՛մ խաղաղության համաձայնագիրը, կա՛մ էլ պայմանավորվածություն Հայաստանում ռուսական նոր ռազմակայան տեղակայելու վերաբերյալ։ Այս համատեքստում կարելի է տեղավորել ռուսական պետական ֆինանսավորմամբ գործող «Sputnik Արմենիա» կայքին ԱԺ արտաքին հարաբերությունների հանձնաժողովի նախագահ, Փաշինյանի ապիկար մերձավոր Ռուբեն Ռուբինյանի նյարդային հարցազրույցը։ Ռուբինյանը կրկին պնդել է, որ Թուրքիային և Ադրբեջանին Սյունիքով միջանցք չի տրվելու, իսկ արցախյան հակամարտությունը տակավին չի հանգուցալուծվել, քանզի Արցախի կարգավիճակի հարցը մնում է բաց, և այդ մասին խոսում են նաև ԵԱՀԿ Մինսկի խմբի համանախագահները։ Ռուբինյանի պնդմամբ` Հայաստանն Ադրբեջանի հետ խաղաղության համապարփակ պայմանագիր չի ստորագրի այնքան ժամանակ, քանի դեռ լուծված չէ արցախյան հիմնախնդիրը։

Այցից առաջ Նիկոլ Փաշինյանի իշխանությունը ինչ-որ բան է ակնարկում ռուսական կողմին։ Թե որքանո՞վ ականջալուր կլինեն Մոսկվայում Հայաստանի խնդրանքներին, բարդ է ասել՝ հաշվի առնելով հատկապես ՀՀ իշխանությունների նկատմամբ ոչ այնքան դրական ու հարգալից վերաբերմունքը։

Դավիթ Սարգսյան