Խորհրդարանական ընդդիմությունը պարտավոր է պայքարել հանուն պետության
ՎԵՐԼՈՒԾՈՒԹՅՈՒՆՆԵՐ
«Պետություն ղեկավարելը թթու թան չի, ամեն մեկի խելքի բան չի»։ Առաջիկայում տեղի կունենա 8-րդ գումարման Ազգային ժողովի նստաշրջանը, ու խորհրդարան անցած քաղաքական ուժերը կսկսեն ակտիվ պայքարը երկրի թիվ մեկ ամբիոնից։ Հաշվի առնելով Նիկոլ Փաշինյանի և նրա կողմնակիցների հայտարարությունները, հռետորաբանությունը, պետական համակարգի ողնաշարը ջարդելու տրամադրվածությունը՝ ստիպված ենք փաստել, որ պետծառայողների համար միակ հենարանը մնալու են ընդդիմադիր երկու քաղաքական ուժերը։
Դաշինքներ, որոնց ղեկավարներն ու ներկայացուցիչների մեծ մասը քսան տարի եղել են Հայաստանի ղեկին, իրենք են լավից-վատից ղեկավարել այդ պետական համակարգը, և այսօր՝ Արցախի կորստի, բանակի ջախջախման, պետական մարմինների նվաստացման ֆոնին նրանց սիրտն էլ պիտի ցավա երկրի գլխին կանգնած վտանգի առջև։ Նոր ընդդիմությունը անասելի մեծ շանս ունի Ազգային ժողովում լինելու պետական ինստիտուտների խոսափող, ներկայացնելու կատարվածը, օգնելու մարդկանց, որոնք դառնալու են Նիկոլ Փաշինյանի ահաբեկումների թիրախը։ Այս առումով մեկ անգամ ևս հարկ է ընդգծել ընդդիմության կողմից մանդատները վերցնելու անհրաժեշտությունը։
«Քաղաքացիական պայմանագրին» խորհրդարանում միայնակ թողնելու դեպքում իշխանությունն ավելի է լկտիանալու, վերացնելու պետականության, պետական հաստատությունների վերջին փշուրները՝ իրականություն դարձնելով արտաքին ուժերի կողմից իրենց վրա դրված ստոր առաքելությունը։ «Հայաստան» և «Պատիվ ունեմ» դաշինքները ունեն պարտավորություն, և պատմությունը չի ների նրանց, եթե չօգտվեն այդ հնարավորությունից, խորհրդարանում և ամենուր իրենց ստացած մանդատների և ունեցած քաղաքական կշռի հանգույն պայքարեն Հայաստանը կործանման տանող փաշինյանական իշխանության դեմ։
Գնել Սիրունյան
