Ապիկար իշխանությունը կադրային ջարդ է խոստանում

Անվտանգության խորհրդի քարտուղար Արմեն Գրիգորյանը Հանրային հեռուստատեսության եթերում հայտարարել է, թե իշխող ուժը կադրային ջարդ իրականացնելու մանդատ է ստացել և անելու է այդ կադրային ջարդը։ «Պետական համակարգը պետք է կուռ լինի, և միանշանակ ծառայի հաղթած ուժին․․․»,- ասել է Գրիգորյանը։ Մի կողմ թողնենք այն հանգամանքը, որ երեք տարի շարունակ Նիկոլ Փաշինյանի իշխանությունն ամեն ինչ արեց լավագույն կադրերին պետական կառավարման համակարգից դուրս մղելու համար։ Կադրային այնպիսի ջարդ են իրականացրել, որ Հայաստանի առանցքային գերատեսչություններից մեկը՝ Արտաքին գործերի նախարարությունը երկու ամսից ավելի գտնվում է ջախջախված վիճակում։ Կադրային ջարդ իրականացնողը պետք է որոշակի կադրային բազա ունենար, մարդիկ, ովքեր գոնե տեղյակ են իրենց ղեկավարած ոլորտներից, կամ խորհրդարանում օրենսդիր ակտիվ աշխատանքով են զբաղվում։

Ուսումնասիրենք «Քաղաքացիական պայմանագիր» կուսակցության ընտրական ցուցակը։ Աննշան բացառություններով մարդիկ են, որոնք հիմնովին ձախողել են իրենց վստահված ոլորտները։ Նիկոլ Փաշինյանի ապիկար և տկարամիտ իշխանությունը չունի կադրեր և տևական ժամանակ ստիպված էր յոլա գնալ նախկիններից ժառանգություն մնացած կադրերով։ Նրանց մի մասն անցել է Փաշինյանի թրի տակով և հիմա ավելի մոլի նիկոլական է, քան ՔՊ անդամները։ Իսկ այսօր հռչակված կադրային ջարդը միայն մեկ նպատակ ունի. ոչ թե երկիրը դնել վերականգնման ռելսերի վրա, զարգացնել տնտեսությունը, ուշքի բերել հոգեբանական ծանր վիճակում գտնվող հանրությանը, այլ եղած պետական համակարգում կոտրել դիմադրության վերջին օջախը, որպեսզի մարդիկ այլևս չփորձեն ընդդիմանալ, զսպել իշխանության ախորժակը։

Այս առումով հատկանշական է Երևանի քաղաքապետ Հայկ Մարությանի դեմ սկսված արշավը։ Բնականաբար, Նիկոլ Փաշինյանը ձգտելու է կոտրել պետական համակարգի ողնաշարը, և այդ նկրտումներում չի խնայելու ո՛չ նախկիններին, ո՛չ էլ նախկին յուրայիններին։ Նրանց բոլորին դիտարկելու են որպես թշնամիներ։ Իսկ սեփական պետությունը Օրուելի «Անասնաֆերմայի» վերածել ձգտող փաշինյանականները  թույլ չեն տա որևէ հակաճառում։ Ուստի պետական ծառայողներն անխտիր հայտնվելու են թիրախում։ Եվ եթե պետական ծառայողները չհամարձակվեն երդվել Նիկոլ Փաշինյանի արևով, ստիպված են լինելու դիմում գրել և հեռանալ։ Իսկ նրանց կփոխարինեն տկարամիտ նիկոլականներ, որոնց միակ «արժանիքն» անսահման նվիրվածությունն է փոքրիկ բռնապետիկին։ Հայաստանը մեծ քայլերով գնում է դեպի բռնապետություն, որի ռեսուրսը չունի։ Սա ավելի ծանր հետևանքներ կունենա, քան եղավ Լիբիայում, իսկ թե ինչ եղավ Քադաֆիի հետ, բոլորն են տեսել։

Գարիկ Նալբանդյան