Փաշինյանի թիվ մեկը թիրախը դատավորներն են

Նիկոլ Փաշինյանի թիվ մեկ թիրախը ընտրություններում տարած հաղթանակից հետո լինելու են ըմբոստ դատավորները։ Կառավարման երեք տարվա ընթացքում Փաշինյանը կարողացավ ապականել իշխանության բոլոր ճյուղերը, ձախողվել և ձախողել բացառապես ամեն ամեն բան, բացի դատական ոլորտից, որտեղ իրենց գործի գիտակ և պինդ մասնագետները մինչև վերջ դիմադրեցին նիկոլական ամենաթողությանը։ Փաշինյանին կատաղության էր հասցնում դատարանների դիմադրությունը, հատկապես ընտրություններում իր հիմնական ախոյան Ռոբերտ Քոչարյանի դեմ քրեական հետապնդման գործում։ Որքան էլ նա փորձեց երկրորդ նախագահին պահել անազատության մեջ, դատական համակարգը հրաժարվեց կատարել վարչապետի պահանջները։ Եվ այժմ, երբ Նիկոլ Փաշինյանը կրկին խլել է իշխանությունը, առաջին հերթին «պողպատե մանդատը» կիրառելու է դատավորների նկատմամբ։ Նշենք, որ նա և իր կողմնակիցները այդ փաստը բոլորովին չեն էլ հերքում։

 

Նախօրեին Արդարադատության նախարար Ռուստամ Բադասյանը կրկին ասել է, թե իրենք համակարգային վեթինգ են իրականացնելու։

 

 

Վեթինգին դեռ շատ ժամանակ կա, սակայն մամուլն արդեն հասցրել է գրել, որ գործող իշխանություններն ապօրինաբար գաղտնալսել են դատավորների մի մեծ խմբի, տեսախցիկներ և ձայնագրող սարքեր են դրել դատավորների աշխատասենյակներում։ Դատավորների դեմ որպես մահակ օգտագործվելու է Բարձրագույն դատական խորհուրդը, որն այսօր ժամանակավորապես ղեկավարում է տխրահռչակ Գագիկ Ջհանգիրյանը։ Այս պայմաններում չի բացառվում, որ դատական համակարգը ի վերջո տեղի տա, դատավորների նյարդերը չդիմանան և շատերը ինքնակամ հեռանան պաշտոնից։ Ամեն դեպքում, Փաշինյանի թիվ մեկ թիրախը հայտնի է։ Հաջորդները պարզ կլինեն առաջիկայում։