Սուրճը կարող է պաշտպանել լյարդի հիվանդություններից. հետազոտություն

Մեծ Բրիտանիայի Սաութհեմփթոնի համալսարանի գիտնականները նոր հետազոտության արդյունքում եկել են այն եզրահանգման, որ սուրճի գործածությունը զգալիորեն նվազեցնում է լյարդի քրոնիկ հիվանդության զարգացման հավանականությունը: 

Գիտնականները վերլուծել են կես միլիոն բրիտանացու հիվանդության պատմություններն ու սուրճի գործածության մակարդակը, ինչի արդյունքում եկել են այն եզրահանգման, որ սուրճի սիրահարների մոտ լյարդի քրոնիկ հիվանդության զարգացման հավանականությունը նվազում է 21 տոկոսով՝ ի տարբերություն այն մարդկանց, որոնք սուրճ չեն օգտագործում:

Այս ըմպելիքը պարունակում է օգտակար բաղադրիչներ՝ կաֆեստոլ և կախվեոլ, որոնք, ենթադրաբար, ճնշում են լյարդը վնասող բորբոքային գործընթացները: Այս բաղադրիչները մեծ քանակությամբ պարունակվում են սուրճի հատիկների մեջ: Բացի այդ, սուրճը նաև հարուստ է բոլորին հայտնի կոֆեինով, իսկ այս տարրը հակազդում է լյարդի սպիացման վնասակար գործընթացին, որն ուժեղանում է լյարդի ցիռոզի հետագա զարգացման հետ մեկտեղ:

Մասնագետները հիշեցնում են, որ լյարդի քրոնիկ հիվանդությունը բավական տարածված խնդիր է, որը կարող է շատ վտանգավոր լինել: Յուրաքանչյուր երրորդի մոտ առկա է ոչ ալկոհոլային ճարպային հեպատոզ (զարգացման վաղ փուլերում), որն առավել հաճախ է հանդիպում ավելորդ քաշ ունեցողների շրջանում: Զարգացման հետ մեկտեղ այս հիվանդությունը կարող է վերածվել լյարդի քրոնիկ հիվանդության, ուստի ժամանակին բուժումն սկսելը շատ կարևոր է: Բացի այդ, լյարդի քրոնիկ հիվանդության զարգացման պատճառ կարող է դառնալ նաև ալկոհոլային ըմպելիքների չարաշահումն ու վիրուսային հեպատիտը, ուստի այս գործոններին ևս հարկավոր է լուրջ ուշադրություն դարձնել:

Նյութի աղբյուրը՝ The Daily Mail