Սոցհարցումները վկայում են․ Ռոբերտ Քոչարյանը հաղթում է Նիկոլ Փաշինյանին

Gallup International կազմակերպությունն այսօր հրապարակել է իր նախընտրական հինգերորդ և վերջին հետազոտությունը, որը պարունակում է առաջիկա ընտրությունների վերաբերյալ հիմնական հարցերի պատասխանները, ներկայացնում է թեկնածուների վարկանիշի փոփոխությունների դինամիկան:

Ըստ այդմ, արդեն երկրորդ շաբաթն է, որ վարչապետի պաշտոնակատար Նիկոլ Փաշինյանը անդառնալիորեն պարտվում է երկրորդ նախագահ Ռոբերտ Քոչարյանի գլխավորած «Հայաստան» դաշինքին։

Հունվարից այս կողմ, ըստ զեկույցի, Փաշինյանի ղեկավարած ուժի վարկանիշը 33 տոկոսից նվազել է մինչև 25,2 տոկոսի, մինչդեռ Քոչարյանին հաջողվել է 7,8 տոկոսից հասնել 28,7 տոկոսի։ Բնականաբար, իրենց համար անցանկալի արդյունքները տեսնելով՝ փաշինյանականները սկսեցին մեղադրել սոցիոլոգիական ընկերությանը, մինչդեռ հենց իրենք էին տարիներ շարունակ հրճվանքով տարածել Gallup International-ի հարցման տվյալները, երբ դեռ «Քաղաքացիական պայմանագիրն» ու Նիկոլ Փաշինյանը վայելում էին մեծամասնության աջակցությունը։

Զգալի աճ է գրանցել նաև Սերժ Սարգսյանի և Արթուր Վանեցյանի հիմնած դաշինքը՝ «Պատիվ ունեմ»-ը, 1,6 տոկոսից մինչև 10,8 տոկոսի։

Ըստ հարցման, խորհրդարան անցնելու շեմը կարող են հաղթահարել նաև«Բարգավաճ Հայաստանն» ու «Լուսավոր Հայաստանը»։ Մյուս ուժերը նույնիսկ մոտ չեն անցնելու հավանականությանը։

Այս բոլոր ուժերն էլ աներկբա հայտարարել են, թե որևէ պարագայում կոալիցիա չեն կազմի Փաշինյանի հետ։ Փաշինյանի համար մեկ այլ տխրելու առիթ է նաև ընտրություններին մասնակցել ցանկացողների թիվը։ Միանշանակ մասնակցելու է հարցվածների 51.1 տոկոսը, ավելի շուտ կմասնակցի 11.4 տոկոսը։ Գաղտնիք չէ, որ Փաշինյանին ամեն կերպ պետք էր ընտրողների ցածր մասնակցություն, որպեսզի կարողանա ընդհանուր ֆոնին ավելի շատ տոկոսներ ստանալ, բայց բարձր մասնակցության դեպքում նա այլևս վերարտադրվելու շանսեր չի ունենա։

Վաչագան Հակոբյան