Շուշիի սիմվոլիկ նշանակությունը Հայաստանի և հայ ժողովրդի համար
ՔԱՂԱՔԱԿԱՆՈՒԹՅՈՒՆ
Ալիևի և Էրդողանի Շուշի այցի վերաբերյալ Արցախի խորհրդարանն արձագանքել է՝ նշելով, որ Թուրքիայի նախագահի նմանօրինակ քայլը սադրիչ գործողություն է տարածաշրջանում փխրուն կայունության հաստատման դեմ։
Այս թեմայով զրուցել ենք ադրբեջանագետ, ԱԺ պատգամավոր Տաթևիկ Հայրապետյանի հետ՝ պարզելու համար, թե ինչ անելիք ունի այս մասով ՀՀ ԱԺ-ն։
Հարցին, թե ՀՀ ԱԺ-ն ինչ անելիքներ ունի այս մասով՝ Տաթևիկ Հայրապետյանը պատասխանել է․ «Նախ ասեմ, որ ես ևս սադրիչ եմ համարում Էրդողանի այցը Շուշի՝ հաշվի առնելով նաև Շուշիի սիմվոլիկ նշանակությունը Հայաստանի և հայ ժողովրդի համար: Բացի այդ պետք է նշեմ, որ այցն ուղեկցվում է ակնհայտ պանթուրքական տրամադրություններ հրահրող հայտարարություններով, Զանգեզուրի «միջանցքի» մասին խոսակցություններով, ինչպես նաև հայտարարություն տարածվեց Շուշիում թուրքական հյուպատողություն բացելու մտադրության վերաբերյալ: Դրան զուգահեռ, իհարկե, ուժի ցուցադրման ատրիբուտներ կան, ինչպես օրինակ, երկու թուրքական պետությունների ղեկավարները խոստովանեցին, որ Թուրքիան ակտիվորեն ներգրավված է եղել վերջին 44-օրյա պատերազմում, այդ ժամանակ թուրքական «Բայրաքթարներ» են օգտագործվել, և պատրաստվում են նման «Բայրաքթարներ»-ի արտադրություն հիմնել նաև Ադրբեջանում: Այսինքն, ոչ միայն այցն ինքնին, այլև ուղեկցող հայտարարություններն ու տեքստերը ակնհայտ ցույց են տալիս մեր տարածաշրջանում պանթուրքական տրամադրությունների աճը, ինչի մասին բազմաթիվ առիթներ եմ ունեցել խոսելու նաև մինչև պատերազմը: Իմ գնահատմամբ, այդպիսի տրամադրությունների միտումների աճը անվտանգային մարտահրավեր է ոչ միայն Հայաստանի ու Արցախի մեր հայրենակիցների, այլ նաև տարածաշրջանի այլ երկրների համար: Ուստի ես կարծում եմ, որ այս այցն իսկապես վտանգում է և մարտահրավեր է պատերազմից հետո ձեռք բերված շատ փխրուն կայունությանը:
Ինչ վերաբերում է խորհրդարանին, ապա գիտեք, որ այս նստաշրջանի օրակարգում ընդգրկված էր Ադրբեջանի և Թուրքիայի գործողությունների հետ կապված համապատասխան հայտարարությամբ հանդես գալու նախագիծ, որն առաջարկել էին խմբակցություններում չներգրավված պատգամավորները, սակայն ինչպես տեսաք, քվորում չապահովելու պատճառով նիստը չկայացավ: Բնականաբար, դա բացատրվում է նախընտրական շրջանով, քանի որ և ընդդիմության, և իշխանության ներկայացուցիչները զբաղված են ակտիվ քարոզչությամբ և չէին ներկայացել Ազգային ժողով: Այսինքն մեր խորհրդարանը ևս իր օրակարգում ունի այդ հարցը, ուղղակի իրավիճակով պայմանավորված ԱԺ նիստ չի կայացել»։
Սոնա Գիշյան
