Հայաստանը կանգնած է քաղաքացիական պատերազմի շեմին․ զրկե՛լ Փաշինյանին այդ շանսից
ՎԵՐԼՈՒԾՈՒԹՅՈՒՆՆԵՐ
Հայաստանը կանգնած է քաղաքացիական պատերազմի շեմին, օրեցօր ավելի են ակտիվանում նման խոսակցությունները։
Առնվազն երկու փորձառու և հայտնի գործիչներ՝ առաջին և երրորդ նախագահներ Լևոն Տեր-Պետրոսյանն ու Սերժ Սարգսյանը վերջին օրերին ահազանգել են քաղաքացիական պատերազմի վտանգի մասին։
Տեր-Պետրոսյանն ու իր կողմնակիցները զգուշացնում են, որ կա այդ վտանգը և գնալով ահագնանում է։ Իսկ Սերժ Սարգսյանը քարոզչական հանդիպման ժամանակ երեկ նշել է, թե Նիկոլ Փաշինյանի օրոք Հայաստանը տեսել է բոլոր արհավիրքները՝ պարտություն, հազարավոր երիտասարդների մահը, և մնացել է մի հատ էլ քաղաքացիական պատերազմ։
«Երևի մնացել է այդ մեկը, դա էլ թող ցույց տա, որպեսզի ընդհանրապես մեր արժանապատվությունը հասնի զրոյի: Բայց մենք պատրաստ պետք է լինենք դրան դիմակայելու: Մենք իր պողպատյա հեղափոխությանը պետք է դեմ տանք ավելի կարծր նյութից պատրաստված վահան, ձեռքներիս էլ դագանակ ունենանք, որպեսզի ով մուրճը ձեռքին գա, դագանակով գլխին տանք, ուրիշ ձև չկա, ի՞նչ անենք»,-ասել է երրորդ նախագահը։
Պարտության հոտից խելացնորված Նիկոլ Փաշինյանն անում է ամենը՝ իրավիճակը բախումների տանելու համար։ Քաղաքական հակառակորդները ստիպված են արձագանքել դավադիր այդ կոչերին, իսկ երկրում իրավիճակն ավելի է թեժանում։ Չմոռանանք, որ այսօր Նիկոլ Փաշինյանի դեմ պայքարող հիմնական ընդդիմադիր ուժերը լուրջ հնարավորություններ, նյութական, մարդկային և ֆինանսական ռեսուրսներ ունեն, և ինչ-որ պահի երկրում կարող է իրավիճակը դուրս գալ վերահսկողությունից։
Հայաստանում քաղաքացիական բախումներից խուսափելու մի եղանակ կա. մասնակցել հունիսի 20-ին կայանալիք արտահերթ ընտրություններին և քվե տալ ընդդիմադիր ուժերին։ Որքան սակավ լինեն Նիկոլ Փաշինյանին տրվելիք քվեները, այնքան Հայաստանը շանս ունի խուսափել քաղաքացիական պատերազմից։ Փոքր տոկոս ստացած Նիկոլ Փաշինյանն այլևս չի կարողանա իրականացնել իր դավաճանական մտահաղացումը։
Ներսես Վիրաբյան
