«Քաղաքացիական պայմանագրում» խառն են․ սկանդալային ձայնագրության հետքերով

Համացանցում երեկվանից տարածվում է Հայաստանի Տարածքային կառավարման և զարգացման նախարարի ժամանակավոր պաշտոնակատար Սուրեն Պապիկյանի և Էջմիածնի քաղաքապետ Դիաննա Գասպարյանի հեռախոսազրույցը: Դիանա Գասպարյանը դժգոհում է Նիկոլ Փաշինյանից, հայտարարելով, թե վերջինս հանուն պետության պետք է հեռանա։

«Հանուն պետության ինքը պիտի գնա, թող թիմից ուրիշին ընտրեն, թող քեզ ընտրեն, իրան տարել ա արդեն, իրա հոգեկանը չի դիմանում»,- լացակումած ասում է քաղաքապետը:

Պապիկյանն ի պատասխան հորդորում է հանգստություն պահպանել և ոչինչ չձեռնարկել։ Գաղտնալսումն ուշագրավ է այնքանով, որ հերթական անգամ ապացուցվում է վաղուց հայտնի փաստը․ «Քաղաքացիական պայմանագրում» էլ հրաշալի գիտեն իրենց առաջնորդի բարոյահոգեբանական խաթարված նկարագիրը, սակայն ոչինչ չեն ձեռնարկում՝ կանխելու վտանգավոր զարգացումները։ Իրեն հարգող քաղաքական գործիչը րոպե անգամ չէր մնա նման նկարագիր ունեցող առաջնորդի կողքին, սակայն ՔՊ-ականների դեպքում բոլորովին այլ է։ Լավ իմանալով, թե ինչերի է ընդունակ Նիկոլ Փաշինյանը, նրանք շարունակում են աջակցել այդ անձին, հավակնել վերարտադրվելու։ Վստահաբար, ո՛չ առաջին, ո՛չ էլ վերջին նման զրույցն է, մասնավոր զրույցներում իշխանական պատգամավորներն ամենավերջին արտահայտություններն են անում Նիկոլ Փաշինյանի հասցեին, նույնիսկ ամենամերձավորները, բայց հրապարակավ շարունակում են օգտվել պետական բարիքներից, ժպիտը դեմքներին քարոզարշավ անում, փորձում ընտրողին համոզել, թե պատերազմում կրած խայտառակ պարտության համար մեղավոր չէր «էն խեղճ հարիֆը» (ձևակերպումը մերը չէ, այլ Փաշինյանի մեկ այլ մերձավոր Սամվել Բաբայանինը-հեղ): Բարդ է ասել՝ սովորական հանցակցությո՞ւն է սա, թե՞ պետական պաշտոնյաները պատանդ են մնացել Նիկոլ Փաշինյանի ձեռքում։ Ամեն դեպքում, հունիսի 20-ից հետո ՀՀ քաղաքացիները կկարողանան Փաշինյանի ճիրաններից ազատել նրա կողմնակիցներին, իսկ օրենքը խախտածներին՝ պատասխանատվության ենթարկելու։

Հայկ Ստեփանյան