Եթե իրադարձությունները զարգանան Լավրովի ասածով, ապա մշակութային ինքնավարությունից ավելի բարձր ոչինչ չենք էլ կարող ակնկալել
ՔԱՂԱՔԱԿԱՆՈՒԹՅՈՒՆ
Ռուսաստանի Դաշնության արտգործնախարար Սերգեյ Լավրովն ասել է, որ Լեռնային Ղարաբաղի կարգավիճակի հարցը պետք է համաձայնեցնել ԵԱՀԿ Մինսկի խմբի համանախագահ երկրների հետ՝ ընդգծելով, որ այս պահին, սակայն, վաղ է այդ հարցը օրակարգային դարձնել:
Այս թեմայով զրուցել ենք քաղաքագետ Քաղաքական և տնտեսական ռազմավարական հետազոտությունների կենտրոնի տնօրեն Բենիամին Պողոսյանի հետ։
Հարցին, թե քաղաքագետն ինչպես է գնահատում Լավրովի հայտարարությունը պատասխանել է․ «Թեև Լավրովը ֆիքսում է, որ կարգավիճակի հարցը պետք է քննարկել Մինսկի խմբի համանախագահ երեք երկրների շրջանակներում, բայց նաև ասում է, որ Ռուսաստանի համար նպատակահարմար չէ առաջիկա տարիներին այդ հարցը քննարկել այդ ձևաչափում: Եթե առաջնորդվենք այս տրամաբանությամբ, որ Արցախի կարգավիճակի հարցը առկախվում է մինչև տնտեսական հարաբերությունների հաստատումը, ընդ որում կարող ենք ենթադրել, որ առկախվում է Հայաստանի ու Ադրբեջանի միջև, գուցե նաև՝ Արցախի ու Ադրբեջանի, ապա, ակնհայտ է, որ այդ դեպքում շատ ավելի բարդ կամ իմաստազուրկ կլինի խոսել Արցախի անկախ կամ Հայաստանին միացնելու կարգավիճակի մասին: Որովհետև, եթե իսկապես տնտեսական ու որոշակի հարաբերություններ հաստատվեն և լարվածությունն ու թշնամանքը սկսեն նվազել, ապա հետագայում հարց կառաջանա թե ի՛նչ կարգավիճակի մասին է խոսքը, քանի որ մարդիկ այս կամ այն կերպ ապրում են, հետևաբար, կարող են այդպես էլ ապրել, բայց արդեն՝ Ադրբեջանի կազմում մնալու ձևով: Եթե իրադարձությունները զարգանան Լավրովի ասածով, ապա մշակութային ինքնավարությունից ավելի բարձր ոչինչ չենք էլ կարող ակնկալել»։
Սոնա Գիշյան
