Ընտրությունների քարոզարշավը սկսել է մտահոգել միջազգային կառույցներին

Խորհրդարանական արտահերթ ընտրությունների քարոզարշավն այնքան բուռն է ընթանում, որ արդեն սկսել է մտահոգել միջազգային իրավապաշտպան կառույցներին։ Անկախության 30 տարիների ընթացքում Հայաստանը բազում ընտրություններ է տեսել, թեժ ու ոչ այնքան թեժ քարոզարշավներ, բռնություններ, սակայն նման վտանգավոր և անորակ ընտրարշավ երբևէ չի եղել։ Նիկոլ Փաշինյանի իշխանությունը հատում է մարդկային և հանրային ընդունված բոլոր նորմերը, հայհոյում և վիրավորում մրցակիցներին, ընդհուպ ֆիզիկական հաշվեհարդարի սպառնալիքներ հնչեցնում։ Միջազգային իրավապաշտպան Freedom House կազմակերպությունն էլ երեկ մտահոգություն է հայտնել Հայաստանում նախընտրական շրջանում քաղաքական գործիչների կողմից ատելության և բռնության խոսքի կիրառման կապակցությամբ:

«Նման գործողությունները նպաստում են հասարակության բևեռացմանն ու ատելության խոսքի տարածմանն այն պայմաններում, երբ երկիրը վերականգնվում է ԼՂ-ում պատերազմից հետո և պատրաստվում է պատմական խորհրդարանական ընտրությունների: Բոլոր կուսակցություններին կոչ ենք անում զերծ մնալ նման հռետորաբանությունից և պահպանել վարքի ժողովրդավարական նորմերը ընտրական շրջանի ընթացքում»,- նշված է հայտարարության մեջ։

«Սիրո և համերաշխության» կարգախոսներով իշխանության եկած նիկոլական ժեխը ընտրարշավին մասնակցում է ասես թշնամու դեմ վերջին հուսահատ ճակատամարտի պես։ 44-օրա Ադրբեջանից կրած խայտառակ պարտությանն ու նվաստացումներին գլխահակ դիմացող Փաշինյանը առյուծ է կտրել երկրի ներսում, պատրաստ է գիտակցված ցանկացած ստորություն անել՝ քաղաքական մրցակիցներին վնասելու համար։ Ագրեսիվ և լպիրշ այս հռետորաբանությունը, փաստենք, ոչ մի լավ տեղ չի տանելու Հայաստանը, և ընտրություններին մասնակից իրական ընդդիմադիր ուժերը պարտավոր են միջոցներ ձեռնարկել՝ բախումներ թույլ չտալու համար։ Հայաստանն այլևս չունի նման ռեսուրս։

Արտաշես Գրիգորյան