Դժգույն և դժբախտ Փաշինյանը․ Ե՞րբ նրան կհանձնի ՔՊ-ն
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանը դժգույն և դժբախտ մարդ է, ինչպես և դժգույն և դժբախտ է նրա թիմը՝ «Քաղաքացիական պայմանագիրը»։ Համոզվելու համար բավարար է նայել այն ընտրացուցակը, որն իշխող կուսակցությունը ներկայացրել է Կենտրոնական ընտրական հանձնաժողով։
Տարիներ շարունակ ժողովրդավարության, բարեփոխումների, նոր քաղաքական մշակույթի մասին բարբառող ուժն այսօր անզոր է քաղաքական տեքստեր արտաբերել, փոխարենը գիտակցաբար արդարացնում են իրենց առաջնորդի յուրաքանչյուր անհեթեթ միտք։
ԱԺ 7-րդ գումարման խմբակցության 83 անդամներից առնվազն երկու տասնյակն այս անգամ տեղ չեն գտել ընտրական ցուցակում, փոխարենը մարդիկ են, ովքեր առավել ջանադրությամբ են քծնում Փաշինյանին։ Ընդհանրապես, այդ խմբակցության աշխատանքին փոքրիշատե ծանոթ մարդը կնկատի, որ ընտրական ցուցակը կազմվել է ոչ թե արժանիքների, ունեցած քաղաքական կշռի, բովանդակային խոսքի սկզբունքներով, այլ բացառապես Փաշինյանի համար կոկորդ պատռելու սպարտակիադայի սկզբունքով։
Նա, ով ավելի շատ է քծնում Փաշինյանին, ով ավելի մեծ հարված է վերցնում իր վրա՝ սվաղելով հնարավոր և անհնարին բոլոր հիմարությունները, ով ավելի շատ հայհոյանքի է արժանանում ընտրողների կողմից, ցուցակում ավելի բարձր հորիզոնականում է։
«Քաղաքացիական պայմանագիրը» 2015 թվականին ստեղծվելուց հետո մշտապես հայտարարում էր, թե քննարկումներն իրենց կուսակցությունում անցնում են բուռն, իսկ որոշումներն ընդունվում են մեծամասնության քվեարկությամբ։
Մեծամասնությունը, պարզվեց, Փաշինյանն է և իր բռնապետական մոտեցումը։ Սեփական կուսակցությունում ժողովրդավարությունն ու բազմակարծությունը խեղդող կուսակցապետը, բնականաբար, չի կարող երկրի կառավարման գործում առաջնորդվել այդ սկզբունքներով։
Նման քաղաքական միավորները, ինչպես ցույց է տալիս պատմական փորձը, նաև հարատև չեն, և առաջին իսկ լուրջ ցնցման դեպքում տրոհվում են։
Ընտրարշավի այս ընթացքը կարող է հանգեցնել «Քաղաքացիական պայմանագրի» փլուզման, և դրանից հետո Նիկոլ Փաշինյանին՝ այսօր հավատարմության երդում տվողներն առաջինը կհանձնեն նրան և հաճույքով էլ ցուցմունք կտան նրա դեմ։ Միակ հարցը, թե ե՞րբ կհասնի այդ օրը, և ո՞վ առաջինը քար կնետի վարչապետի պաշտոնակատարի վրա։
Արամ Գրիգորյան
