Մեզ չեն հարգի, մինչեւ չկարողանանք վերականգնել մարտունակ բանակի կարգավիճակը. Քոչարյան

Մենք բոլորս պատմական պահ ենք ապրում: Իսկապես պետք է երկիրը փրկել: Բայց խնդիրը ոչ թե մեկ մարդուն հեռացնելն է, դա շատ փոքր քայլ է այն նպատակներից, որոնք դրել ենք մեր առջեւ: Մենք պետք է երկիրը դուրս բերենք ստեղծված իրավիճակից: Այս մասին Քաջարանում կայացած հանրահավաքում հայտարարեց ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը:

«Առաջին հերթին՝ անվտանգության վերականգնում, բանակի վերականգնում: Մենք պետք է ամեն ինչ անենք, որպեսզի մեր զոհերը «իզուր չլինեն»՝ գիտեք այս արտահայտության աղբյուրը (Նիկոլ Փաշինյանի կինը՝ Աննա Հակոբյանը - խմբ.): Եւ մենք դա կանենք: Առաջ կտանենք Հայաստանի Հանրապետությունը, որն ուներ տարածաշրջանում ամենամարտունակ բանակ ունեցող երկրի կարգավիճակ, կվերականգնենք կարգավիճակը, հակառակ դեպքում կկանգնենք այն երկրների շարքում, որոնք ի վիճակի չեն պաշտպանել իրենց սահմանները, ի վիճակի չեն առանց դաշնակիցների օգնության ապահովել իրենց ժողովրդի անվտանգությունը: Սա լավ կարգավիճակ չէ, եւ այլ երկրների, գերտերությունների կողմից հարգանք չի լինի, մինչեւ մենք չվերականգնենք մեր ինքնիշխանությունը եւ մեր ուժերով պաշտպանենք ինքներս մեզ եւ մեր սահմանները»,- ասաց Ռոբերտ Քոչարյանը:

«Երկրորդ ամենակարեւոր հարցը տնտեսական վերելքն է: Ինձ հաջողվեց դա անել 1998-2008 թվականներին, խոստանում եմ ձեզ այստեղ եւ հիմա, որ մենք նորից կանենք դա: Կտեսնեք՝ բոլոր առակներն այն մասին, թե Հայաստանը աղքատ երկիր է եւ ռեսուրսներ չունի, կեղծ են: Զարգացման համար ամենամեծ ներուժը դուք եք: Բայց դուք պետք է հավատաք ձեր ուժերին, դուք եք այս երկրի տերը: Մենք ձեզ կվերադարձնենք այդ զգացողությունը եւ կանենք ամեն ինչ ձեզ հետ միասին ձեր երազած Հայաստանը կառուցելու համար: Վստահ եմ, որ դա հնարավոր է անել, եւ վստահ եմ, որ դուք եւ ես կանենք միասին դա:

Ես ինձ համար որոշել եմ, որ նախընտրական քարոզարշավի ընթացքում ձեզ պետք է լավատեսությամբ լիցքավորեմ: Անհնար է երկիրն առաջ տանել բարոյահոգեբանական ծանր վիճակում: Մենք պետք է վստահենք միմյանց: Եթե մեզ տաք այս մանդատը, վստահ եղեք, որ դա ոչ միայն լավատեսություն է լինելու, այլեւ կոնկրետ գործեր ու արդյունքներ: Ձեր կյանքը կբարելավվի: Յուրաքանչյուր քաղաքացու կյանքի որակը կբարելավվի: Սա է մեր նպատակը:

Մենք առանց ձեզ ոչինչ չենք կարող անել: Երկրում դեռեւս կան շատերը, ովքեր հավատում են ներկայիս իշխանությանը: Որը ստի թագավորություն է ստեղծել պետական կառավարման ողջ համակարգում: Դիմում եմ ձեզ խնդրելով աշխատել մոլորվածների հետ: Ես մերժում եմ նրանց հասցեին բոլոր տեսակի պիտակները՝ սա մոլորված մասն է, որի հետ պետք է աշխատել: Բոլորս միասին՝ համախմբելով ուժերը փորձենք առավելագույնին հասնել հունիսի 20-ին: Համոզված եղեք, որ մենք չենք չարաշահի ձեր վստահությունը, եւ ես վստահ եմ, որ կկարողանամ ասել, որ կատարել եմ խոստացածս: Այսպես ես ապրել եմ իմ ամբողջ կյանքը եւ չեմ փոխվել: Մի փոքր ավելի փորձառու, ավելի իմաստուն, ավելի ուժեղ եմ դարձել»,- ասաց Քոչարյանը: