Փաշինյանին հարկավոր է տանել վախ բռնողի մոտ

Խորհրդարանական արտահերթ ընտրություններին մասնակցում են 26 քաղաքական ուժեր, սակայն Նիկոլ Փաշինյանի ապիկար իշխանությունը, դեռ պաշտոնական քարոզարշավը չմեկնարկած, կռիվ է տալիս միայն մեկ ուժի դեմ։ «Քաղաքացիական պայմանագիրը» մահու չափ վախենում է միայն երկրորդ նախագահից և նրա գլխավորած դաշինքից, իսկ նիկոլական պատգամավորները, պաշտոնյաներն ու ինքը՝ վարչապետի աթոռին հայտնվածը ամեն օր խոսում են բացառապես Ռոբերտ Քոչարյանից։ Խորհրդարանական ամբիոնը վերածվել է Քոչարյանի արտաբերած ամեն տառին արձագանքելու հարթակի, իսկ Փաշինյանը երկրորդ նախագահի լուսանկարը ծոցագրպանում է պահում, որ դրանով իբր ահաբեկի ընտրողներին։

Փաշինյանը տպել է Քոչարյանի՝ սպանված առյուծի հետ ունեցած նկարը, խնամքով զետեղել շրջանակի մեջ, և պատեհ առիթներով ցուցադրում է այդ լուսանկարը։ Միգուցե հոգեբանները կբացատրեն վախի այս դրսևորումը, սա նրանց ոլորտից է։ Փաշինյանի իշխանության այս պարանոյան, բնականաբար, ունի բացատրություն։ Երկիրը պատերազմում խայտառակ պարտության հանգեցրած, հինգ հազար զինվորի մահվան պատճառ դարձած ու ամեն ինչ ապականած իշխանավորները հրաշալի գիտեն Քոչարյանի թե՛ հնարավորություննները, թե՛ կամային որակները։ Եվ, իհարկե, փորձելու են ամեն կերպ վարկաբեկել երկրորդ նախագահին։ Սակայն, ինչպես սովորաբար լինում է այս իշխանության դեպքում, Ռոբերտ Քոչարյանի դեմ հակաքարոզի գործում էլ են ձախողվելու։ Առանց այն էլ գրագետ քարոզարշավ իրականացնող «Հայաստան» դաշինքը նոր «օգնական» է ստացել՝ ի դեմս սարսափահար իշխանավորների, որոնք մատնում են իրենց վախերը։

Իսկ պատերազմից հետո հոգեբանական ծանր վիճակում գտնվող հանրությունն այսօր ուժեղ ձեռքի, երկիրը անդունդից հանողի կարիքն ունի։ Տպավորություն է, թե «Հայաստան» դաշինքն է իշխանությունը, որը վստահ ու վճռական քարոզարշավ է իրականացնում, մինչդեռ իշխանությունը լաչառություն անելով, կորցնելու է փոշիացած վարկանիշի վերջին փշուրները։ Իսկ մինչ քվեարկության օրը լավ կլիներ Նիկոլ Փաշինյանին ու իր թիմակիցներին վախ բռնողի մոտ տանել․ վախը դեռ ոչ ոքի լավ հանգրվանի չի հասցրել։ 

Վահան Իսպիրյան