Պետական համակարգը կաթվածահար է․ իշխանափոխության հոտ են առել

Պետական համակարգը կաթվածահար է․ գերատեսչությունները, նախարարությունները դուրս են եկել գործող իշխանությունների տոտալ վերահսկողությունից։ Պետական ապարատը, մանր ու միջին չինովնիկական դասը միշտ է խիստ զգայուն արձագանքել երկրում կատարվող իրադարձություններին, զգուշավորություն ցուցաբերել քաղաքական հարցերում՝ վախենալով այդ պահին գործող իշխանության զայրույթից։ Այսօր փաստ է, որ պետական ապարատը իշխանափոխության հոտ է առել՝ զգալիորեն կորցնելով զգուշավորությունը։ Եվ շատերը չեն ցանկանում թաթախվել քաղաքական պրոցեսների մեջ, աչքի ընկնել, որպեսզի հետագայում իրենց չկապեն այս գործող իշխանությունների հետ։ Պետական համակարգի բազում աշխատողներ նույնիսկ փորձում են կամուրջներ գցել նախկին իշխանությունների հետ։ Այդ հանգամանքը տեսանելի է անգամ սոցիալական ցանցերում։

Պետական աշխատողները, որոնք նախկինում վախվխում էին պետական գծից շեղվող որևէ բառ գրել, այսօր հանգիստ գրում են, քննադատում են Նիկոլ Փաշինյանի իշխանությանը։ Նույնիսկ դիվանագետները, որոնք մշտապես եղել են ամենազգուշավորը, շատ դեպքերում չեն էլ փորձում թաքցնել իրենց կարծիքը, համակրանքը՝ նախկինների, և հակակրանքը գործող իշխանության հանդեպ։ Դա է պատճառը, որ տասնամյակներ ընտրական գործընթացներին ակտիվ մասնակցած մանր ու միջին չինովնիկներից շատերն այսօր չեն ցանկանում ընդգրկվել ընտրական պրոցեսում, ընտրատեղամասային հանձնաժողովների կամ ընտրական շտաբների անդամներ դառնալ։ Ամբողջ պետական ապարատը սպասողական վիճակում է, թե ինչ է լինելու, ինչ տեսք է ունենալու նոր կառավարությունը հունիսի 20-ի արտահերթ ընտրություններից հետո։ Իսկ իրավիճակը պարզվելուց հետո հավատարմության նոր երդում կտան արդեն նոր իշխանությանը։

Արթուր Ստեփանյան