Գագիկ Ծառուկյանը փշրեց Փաշինյանի հույսերը․ ԲՀԿ-ն կոալիցիա չի կազմի իշխող ուժի հետ

«Բարգավաճ Հայաստան» կուսակցության նախագահ Գագիկ Ծառուկյանը հերյուրանք է համարում Նիկոլ Փաշինյանի հետ պայմանավորվածություններ ունենալու մասին տեղեկությունները և բացառում նրա հետ կոալիցիա կազմելու տարբերակը։

«Բոլորդ էլ գիտեք՝ Ծառուկյանի պահվածքն էլ, դուխն էլ, խոսքն էլ, որ իր խոսքը խոսք է։ Իմ պատիվը, իմ խոսքը ոչ մի բանի հետ չեմ փոխի։ Բացառված է, որ ես միանամ «Իմ քայլի» հետ։ Ես ունեմ ծրագիր, որը ներկայացրել եմ։ Ես գնում եմ մենակ, գնում եմ հաղթելու»,- նախօրեին լրագրողների հետ զրույցում ասել է Գագիկ Ծառուկյանը։

Այս հայտարարությամբ ԲՀԿ առաջնորդը փաստացի վերջ դրեց քաղաքական հակառակորդների կողմից տարածվող կեղծ թեզերին, և վերջնականապես փշրեց Նիկոլ Փաշինյանի հույսերը։ ԲՀԿ կոռեկտ և ծրագրային քարոզարշավը, նախընտրական փուլում դրսևորած պետականամետ վարքագիծը ահաբեկել էին քաղաքական հակառակորդներին, որոնք կեղծ և մանիպուլատիվ տեղեկություններ էին տարածում՝ իբր Ծառուկյանն ընտրություններից հետո, կախված արդյունքներից, կարող է կոալիցիա կազմել ապիկար իշխանության հետ և, իբր ինչ-ինչ նեղ շահերից ելնելով, Փաշինյանին նվիրել վարչապետի պաշտոնը։ Այս թեզերը տրամաբանական որևէ բացատրություն ունենալ չէին կարող։ Դեռ անցած տարվա հունիսից, երբ պատերազմն էլ չէր սկսվել, ԲՀԿ առաջնորդը պարզ և հստակ պահանջում էր կառավարության ամբողջ կազմի հրաժարականը։

Փաշինյանի օրոք կեղծ մեղադրանքներով ազատազրկված, հետապնդումների ենթարկված, բայց մշտապես հանրային շահը սպասարկող քաղաքական ուժի՝ Փաշինյանի հետ կոալիցիա կազմելու հավանականությունը բացառված էր ի սկզբանե։ Այդուհանդերձ, արձանագրենք, որ Ծառուկյանի այս հայտարարությունը լրջագույն հարված էր Փաշինյանի իշխանությանը։ «Քաղաքացիական պայմանագիրը» ունի որոշակի ընտրազանգված, բայց սոցհարցումներն էլ վկայում են, թե չի կարող միայնակ կառավարություն ձևավորել։ «Բարգավաճ Հայաստանն» էլ հստակ հայտարարել է, թե գնում է իշխանությունը վերցնելու և կարիք չունի կոալիցիա կազմելու որևէ ուժի հետ։ Իր այս հայտարարությամբ ԲՀԿ-ն ընդգծում է քաղաքական դաշտում ունեցած ուրույն տեղը, իսկ Ծառուկյանն ապացուցում, որ ժողովրդի թիկունքում ստվերային պայմանավորվածությունների չի գնա այլ ուժերի պես։

Ներսես Գաբրիելյան