Իշխանության ստերը հորդում են, կեղծիքներն՝ ավելանում

Որքան մոտենում են խորհրդարանական արտահերթ ընտրությունները, գործող իշխանության տարածած սուտն ու կեղծիքն այնքան անտանելի են դառնում։ ՀՀ բնակչությունը, որի կենսամակարդակը զգալիորեն ընկել է կորոնավիրուսի համավարակի և պատերազմում կրած պարտության հետևանքով, երեկվանից անխնա ծաղրում է Էկոնոմիկայի նախարար Վահան Քերոբյանի ֆեյսբուքյան գրառումը․

 

 

Իշխանության փնթի մանիպուլյացիան ծաղրում էին բոլորը՝ տնտեսագետներից մինչև շարքային քաղաքացիներ, բայց ոչ իշխանության սազանդարները, որոնք դեմքի լուրջ արտահայտությամբ փորձում էին համոզել, որ մածունը սև է, տնտեսությունն էլ աճում է առաջանցիկ տեմպերով։ Բնականաբար, պարզ է, որ եթե երկրում մարտին ձեռնարկությունները չեն աշխատում, կրկին նույն այդ իշխանության մեղքով, ապրիլին նույնիսկ կես արտադրամասի աշխատանքի վերսկսումը երկնիշ չէ, եռանիշ աճ էլ կարող է գրանցել։ Վահան Քերոբյանի ու իշխանության մյուս ներկայացուցիչների համար էլ հրաշալի առիթ է հատկապես ընտրություններից առաջ չեղած բանը որպես գործող իշխանության ձեռքբերում ներկայացնելը։

 

Քերոբյանից էստաֆետն ընդունեց Ազգային ժողովի «իմքայլական» պատգամավոր, Տնտեսական հարցերի մշտական հանձնաժողովի անդամ Բաբկեն Թունյանը։ Մինչ հեղափոխությունը լավ վերլուծաբանի համբավ վայելող Թունյանը դարձել է իշխանության ստի ու կեղծիքի սրբագրողը, լավ վերլուծաբանից վերածվել քաղաքական գործչի, իսկ այդ դեպքում ստիպված է ոչ թե օբյեկտիվ վերլուծություններ անել, այլ դակել վարչապետի ու գործադիրի անհեթեթությունները։ Նա, իհարկե, խոստովանում է, որ աճ ենք ունեցել, քանի որ սկսել է աշխատել մի բան, որը կանգնած էր, բայց շարունակում է մանիպուլյացիան տնտեսական ակտիվացման մասին։ Արձանագրենք, որ իշխանությունը փչացնում է նախկինում չվարկաբեկված անձանց, իսկ ընտրությունների նախաշեմին սպասենք իշխանության ստի ու կեղծիքի նոր դոզաների և դրսևորումների։ Իսկ ժողովուրդն այդպես էլ իր մաշկի վրա չի զգալու տնտեսական աճը։