Հովիկը «սիրահարվել» է ընկերոջ կնոջը, ծեծել է, ջարդել ծնոտն ու բռնաբարել

1in.am-ը գրում է.

Էրեբունի և Նուբարաշեն վարչական շրջանների ընդհանուր իրավասության դատարանում Վլադիմիր Գրիգորյանի նախագահությամբ ավարտվել է Հովհաննես Հովհաննիսյանի գործի դատավարությունը:

Հովհաննես Հովհաննիսյանը նախկինում երկու անգամ դատապարտվել է: Սա երրորդն է: Բոլոր դատապարտություններն էլ կապված են ներկա՝ երրորդ գործով տուժող Արմինեի (անունը փոխված է) հետ:

Ներկայումս 38-ամյա Արմինեն ամուսնու և 1996 ու 2000 թվականներին ծնված որդու ու դստեր հետ բնակվել է Երևանի արվարձանային շրջաններից մեկում:

Իրենից 11 տարով փոքր, ներկայումս 27-ամյա Հովհաննեսի հետ Արմինեն ծանոթացել է, երբ Հովհաննեսը գնացել-եկել է հարևանությամբ բնակվող պապիկի տուն:

2007 թվականից Հովհաննեսը ընկերացել է Արմինեի ամուսնու հետ: Եվ ինտիմ կապի մեջ է մտել Արմինեի հետ:

Հովհաննեսը դանակահարել է Արմինեի ամուսնուն, պատճառել ծանր մարմնական վնասվածք, ինչի համար 2008 թվականին կալանավորվել է, ապա Շենգավիթ համայնքի առաջին ատյանի դատարանի դատավճռով դատապարտվել 3 տարի ազատազրկման:

Հովհաննեսն այդ պատժից ազատվել է 2011 թվականի օգոստոսի 30-ին:

Ազատություն դուրս գալով՝ նա վերահաստատել է ինտիմ կապը Արմինեի հետ:

2012 թվականի օգոստոսի 1-ին, ժամը 20-ի սահմաններում Հովհաննեսն իր «ՎԱԶ-2106» մեքենայով գնացել է Արմինեի տան մոտ, ոտքերով հարվածել տան դարպասին, քարեր նետել բակ, մեքենայից վերցրած լինգով սպանության սպառնալիքներ տվել Արմինեի ամուսնուն և Արմինեին: Արմինեի ամուսինն էլ մետաղե խողովակով հարվածել է Հովհաննեսի մեքենային ու Հովհաննեսին պատճառել 600 հազար դրամի գույքային վնաս:

Առանձին քրեական գործեր են հարուցվել Հովհաննեսի և Արմինեի ամուսնու արարքների փաստերով:

2013 թվականի փետրվարի 27-ին Շենգավիթ վարչական շրջանի ընդհանուր իրավասության դատարանը Հովհաննես Հովհաննիսյանին մեղավոր է ճանաչել ՀՀ քրեական օրենսգրքի 137 հոդվածի 1-ին մասով և դատապարտել 1 տարի ազատազրկման: Մինչև դատավճռի ուժի մեջ մտնելը Հովհաննեսի խափանման միջոցը եղել է չհեռանալու մասին ստորագրությունը:

Կայացված դատավճիռը բողոքարկվել է: Դատավճռի բողոքարկման փուլում Հովհաննեսն ու Արմինեն շարունակել են ինտիմ կապը: Մասնավորապես՝ 2013 թվականի մարտի 8-ին իրար հետ գնացել են հյուրանոց ու սեռական հարաբերություն ունեցել: Հովհաննեսն Արմինեին օծանելիք է նվիրել Մարտի 8-ի առթիվ:

Հաջորդ օրը՝ ոչ տոնական մարտի 9-ին, ժամը 18-ն անց 30-ի սահմաններում Հովհաննեսը գնացել է Արմինեի տան մոտ և դուրս կանչել նրան: Արմինեն դուրս չի եկել, իսկ երբ Հովհաննեսը համառել է, նա զանգահարել է ոստիկանություն և ահազանգել, որ իր նախկին ընկեր Հովհաննեսը իրեն դուրս է կանչում տնից ու սպառնալիքներ է տալիս:

Նույն օրը Արմինեն ոստիկանությունում հաղորդում է տվել, որ Հովհաննեսը ցատկելով իրենց դարպասի վրայով՝ մտել է իրենց բակ, սպառնացել, որ եթե ինքը բակ դուրս չգա, ապա կմտնի տուն և իր աչքի առաջ կսպանի իր երեխաներին:

Ոստիկանությունում նյութեր են նախապատրաստվել, որոնց հիման վրա 2013 թվականի մարտի 12-ին քրեական գործ է հարուցվել քրեական օրենսգրքի 137 հոդվածի 1-ին մասով: Այս գործով հետագայում որոշում է կայացվել քրեական հետապնդումը դադարեցնել՝ հանցակազմի բացակայության հիմքով:

Իսկ մարտի 11-ին, ժամը 16-ին «Էրեբունի» բժշկական կենտրոնից ոստիկանության Էրեբունու բաժնում հաղորդում է ստացվել, որ ստորին ծնոտի հոդախախտով բուժօգնության է դիմել Արմինեն՝ հայտարարելով, որ իրեն բռնաբարել են:

Նույն օրը Արմինեն հաղորդում է տվել, որ ժամը 14-ի սահմաններում իր ծանոթ Հովհաննեսը Նուբարաշենի տարածքում իր մեքենայի մեջ փորձել է իրեն բռնաբարել: Ինքը մի կերպ դուրս է պրծել նրա ձեռքից, բայց նա բռնել է իրեն, ծեծել, կոտրել իր ծնոտը ու, այնուամենայնիվ, բռնաբարել:

Հարուցվել է քրեական գործ բռնաբարության փաստով՝ ՀՀ քրեական օրենսգրքի 138 հոդվածի 1-ին մասի հատկանիշներով:

Նույն օրը՝ մարտի 11-ին, Հովհաննես Հովհաննիսյանը ձերբակալվել է:

Մարտի 14-ին որոշում է կայացվել Հովհաննիսյանին որպես մեղադրյալ ներգրավել քրեական օրենսգրքի 131 հոդվածի 2-րդ մասի 3-րդ կետով և 138 հոդվածի 1-ին մասով:

Ըստ գործի տվյալների՝ 2013 թվականի փետրվարին Արմինեն ցանկացել է խզել կապը Հովհաննեսի հետ, պահանջել է, որ նա այլևս իրեն չանհանգստացնի:

Չհամակերպվելով Արմինեի հեռանալու մտքի հետ՝ Հովհաննեսը մարտի 11-ին, ժամը 14-ին փողոցում տեսնելով մենակ քայլող Արմինեին, նրան առևանգելու մտադրությամբ մեքենան կտրուկ վարել է նրա ուղղությամբ, արգելակել անմիջապես նրա կողքին, պահանջել, որ Արմինեն նստի մեքենա:

Մերժում ստանալով՝ Հովհաննեսը մեքենայից վերցրել է պտուտակահանը, իջել, պտուտակահանը սեղմել Արմինեի մեջքին, բռնություն գործադրելով, նրա կամքին հակառակ՝ նստեցրել մեքենա, ապա շարունակելով հարվածներ հասցնել՝ առևանգել է նրան, տեղափոխել Նուբարաշենի մի ամայի տարածք, բռնության գործադրմամբ մեքենայի սրահում սեռական հարաբերություն է ունեցել Արմինեի հետ, որից հետո, երբ կինը ցանկացել է փախչել, հետապնդել է, նորից ծեծել նրան, պատճառել մարմնական վնասվածքներ:

Ընդհանուր իրավասության դատարանում Հովհաննես Հովհաննիսյանն իրեն մեղավոր չի ճանաչել:

Նա հայտնել է, թե Արմինեի հետ մարտի 11-ին պատահաբար է հանդիպել: Արմինեն իր կամքով նստել է մեքենա, փոխադարձ համաձայնությամբ գնացել են Նուբարաշենի մի ամայի տարածք:

Մեքենայի մեջ փոխադարձ համաձայնությամբ սեռական հարաբերություն են ունեցել, որի ժամանակ Արմինեն իրեն վատ է զգացել և ուշաթափվել:

Նրան ուշքի բերելու համար ինքը մի քանի ապտակ է հասցրել: Ահա թե ինչից է Արմինեն մարմնական վնասվածքներ ստացել: Այնուհետև հենց ինքն էլ իր մեքենայով նրան տեղափոխել է «Էրեբունի» բժշկական կենտրոն, որ Արմինեին բուժօգնություն ցուցաբերեն:

Ինքը Արմինեին չի առևանգել, պտուտակահանով չի սպառնացել, այդ պտուտակահանը մշտապես իր մեքենայի սրահում է՝ մագնիտոֆոնի անսարքությունները վերացնելու համար:

Ամբաստանյալը պնդել է, թե ինքն Արմինեին չի բռնաբարել, իրենք փոխադարձ համաձայնությամբ սեռական հարաբերություն են ունեցել:

Տուժողը դատարանում հայտնել է, թե դեպքի օրը ինքը գնում էր վարսավիրանոց:

Հովհաննեսը մեքենայով կտրել է իր ճանապարհը, պտուտակահանով սպառնալով՝ ստիպել, որ մեքենա նստի: Ինքը Հովհաննեսին լավ էր ճանաչում ու վախեցել է, որ նա պտուտակահանը կարող է մտցնել իր մարմինը: Դրա համար մոտեցել է մեքենային:

Հովհաննեսն իրեն հրել է մեքենայի մեջ, դուռը փակել: Ապա մեքենան վարել է Նուբարաշեն: Ճանապարհին մի քանի անգամ հարվածել է իրեն, սպառնացել, որ եթե փախչի, կսպանի իրեն էլ, երեխաներին էլ:

Ճանապարհին Հովհաննեսն իրենից գումար է պահանջել, վերցրել մեկ հատ հազար դրամանոց, մտել խանութ, գնել երկու շիշ գարեջուր ու ծխախոտ:

Մի ամայի տեղ է քշել մեքենան, ստիպել է, որ ինքը գարեջուր խմի: Ինքը հրաժարվել է: Նա մի քանի անգամ հարվածել է իր դեմքին: Հանել է շորերը: Ինքն ուժասպառ է եղել ու չի դիմադրել: Սեռական հարաբերության կեսից խնդրել է դադարեցնել՝ խոստանալով, որ կհանգստանա ու կամովին կտրվի նրան:

Հովհաննեսը հավատացել է: Ինքն իջել է մեքենայից, նստել մի քարի: Երբ Հովհաննեսը գարեջուր է խմել, ինքը դիմել է փախուստի:

Բայց Հովհաննեսը մեքենան վարել է իր հետևից, հասել իրեն, դաժան ծեծի ենթարկել, որի պատճառով իր ծնոտը ծռվել է:

Հովհաննեսը վախեցել է, իրեն նստեցրել մեքենա, գնացել են խանութ: Այնտեղ ջուր է գնել, իր դեմքին լցրել, մոտակա բենզալցակայանում պարտքով բենզին է վերցրել ու աշխատողին ասել, թե իրեն ինսուլտ է խփել: Հետո իրեն տարել է «Էրեբունի» բժշկական կենտրոն, որտեղ ինքը հայտարարել է, որ իրեն բռնաբարել են:

Դատարանում Արմինեն սկզբում պնդել է նախաքննական ցուցմունքը, հետո սկսել է հակասական ցուցմունքներ տալ: Նա ասել է, թե Հովհաննեսին սիրում է, ցանկանում է նրա հետ ամուսնանալ, իր խղճի վրա ծանր է նստում, որ արդեն երրորդ անգամը Հովհաննեսը դատվում է իր պատճառով: Հովհաննեսն իրեն չի առևանգել, չի բռնաբարել, ինքն իր կամքով է նրա մեքենան նստել ու գնացել Նուբարաշեն: Իր կամքով է Հովհաննեսի հետ սեռական հարաբերություն ունեցել: Ընթացքում վատացել է, ուշաթափվել, իրեն ուշքի բերելու համար Հովհաննեսն ապտակներ է հասցրել: Ոստիկանությունում սուտ հաղորդում է տվել, որովհետև իր հարազատները մոտն են եղել, կաշկանդվել է:

Քննիչն էլ իրեն ահաբեկել է, ասել, որ եթե Հովհաննեսի դեմ ցուցմունք չտա, կզանգի Ռուսաստանում գտնվող իր ամուսնուն ու տեղյակ կպահի:

Իսկ տվյալ պահին ամուսինն ու որդին Ռուսաստանում են, ու ինքը որոշել է ճիշտն ասել:

Ինքը Հովհաննեսի համար հանձնուք է տարել ՔԿՀ, ցանկացել է տեսակցել նրա հետ, բայց մերժում է ստացել: Ինքն ու Հովհաննեսը ցանկանում են ամուսնանալ:

Դատարանն անարժանահավատ է գնահատել տուժողի փոփոխված ցուցմունքը:

Դատաբժշկական փորձաքննության եզրակացությամբ՝ Արմինեին պատճառվել են ստորին ծնոտի հոդախախտ, քթոսկրի կոտրվածք, դեմքի քերծվածքներ, արյունազեղումներ: Նրա առողջությանը հասցվել է թեթև վնաս՝ առողջության կարճատև քայքայումով:

Փորձագետը պարզաբանել է, որ արձանագրված վնասվածքները բնորոշ են տուժողի դեմքին բռունցքով հարվածելու հետևանքով առաջացած մարմնական վնասվածքներին: Ապտակների դեպքում նման վնասվածքներ չէին առաջանա:

Ընդհանուր իրավասության դատարանը ապացույցների համակցությամբ հաստատված է գնահատել Հովհաննես Հովհաննիսյանին մեղսագրված արարքները, նրան մեղավոր ճանաչել և վերջին հաշվով դատապարտել 6 տարի 3 ամիս ազատազրկման:

Պատժի սկիզբը՝ 2013 թվականի մարտի 11-ից: