Այս կառավարությունը զուտ փողի մասին է մտածում․ Գարեգին Միսկարյանը՝ արդյունաբերական կանեփի արտադրությունը թույլատրելու մասին
ՀԱՍԱՐԱԿՈՒԹՅՈՒՆ
Նախօրեին կառավարությունը որոշում կայացրեց, որ Հայաստանում արդյունաբերական կանեփի արտադրությամբ են զբաղվելու։ Տիգրան Ավինյանը հայտարարեց, որ այս ոլորտը շահութաբեր է։
«Քո որոշումը» կուսակցության անդամ Գարեգին Միսկարյանը դեռևս փետրվարին խոսում էր ադյունաբերական կանեփի արտադրության նպատակահարմարության մասին, որ այն շատ շահութաբեր է ու կարող է լավ ցուցանիշներ գրանցել Հայաստանում՝ հաշվի առնելով հողի որակն ու Հայաստանի կլիմայական պայմանները։
ArmDaily.am-ի հետ զրույցում Միսկարյանն ասաց, որ որքանով որ տեղեկատվությունը հասանելի է, իսկ քիչ բան է հասանելի, թե լիցենզավորման գործընթացը որ տնտեսվարողներն են կարողանալու անցնել, ինչ ձև է այդ գործընթացը կարգավորվելու՝ ոչինչ հայտնի չէ։
«Բայց այն խոսակցությունները, օրինակ, որ լիցենզավորումը տրվելու է 60 մլն դրամ գումարի դիմաց կամ որ պարտադիր պայման է լինելու միայն ջերմոցային տնտեսություններում աճեցնել, դա թույլ է տալիս մտածել, որ այս կառավարությունը, ինչպես բոլոր դեպքերում, այս անգամ էլ շատ խորը մոլորության մեջ է, ու այն ամբողջ փիլիսոփայությունը, այն ամբողջ արդյունավետությունը, որ կարող էր ունենալ տեխնիկական կանեփը Հայաստանի անմշակ հողերը մշակելու, աշխատատեղեր, արդյունք ստեղծելու, մարդկանց զբաղվածությունն ապահովելու համար, իրենք դա էլի դարձնում են շատ նեղ անհատների խոշոր եկամուտներ ստանալու կենտրոն։ Ու ես առանձնապես շատ մեծ ոգևորությամբ չեմ իրենց այս որոշումն ընդունում, որովհետև մեզ մոտ նպատակը մշակույթ փոխելն էր, մարդկանց կյանքի որակը փոխելն էր, ոչ թե մի քանի խմբի մարդկանց կամ մի խմբի համար խոշոր եկամուտներ ապահովելը»,-ասաց Միսկարյանը։
Նա նշեց, որ տեսնում է, որ այս կառավարությունը զուտ փողի մասին է մտածում, ոչ թե փողի որակի․ «Իրենք չեն նայում, թե որքանով դա կարող է փոխել մարդկանց կյանքը, գյուղացիների կյանքը։ Այլ իրենք մտածում են, որ այդ մի հնարավորությունն էլ օգտագործեն ինչ-որ մի խումբ մարդկանց շահույթ ապահովելու համար»։
Հայկա Ալոյան
