Դուգինը ներկայացրել է իր անձնական մոտեցումը
ՔԱՂԱՔԱԿԱՆՈՒԹՅՈՒՆ
Նախօրեին ԵԽԽՎ-ում քվեարկությամբ օրակարգ մտավ հայ ռազմագերիների վերադարձի հարցը։ Այսօր էլ ԵԽԽՎ-ն Բաքվից պահանջեց անհապաղ վերադարձնել հայ ռազմագերիներին։
Այս թեմայով 1or.am կայքը զրուցել է իրավաբան, փաստաբան Ռուբեն Մելիքյանի հետ։
—Պարոն Մելիքյան, ի՞նչ ճնշում կարող է ԵԽ-ն գործադրել Ադրբեջանի վրա՝ գերիների վերադարձին հասնելու համար, որովհետև Ալիևը հայտարարում է, որ նրանք գերի չեն, ահաբեկիչներ են:
— Ոչ մի միջոց էլ չի կարող կիրառվել, ես այն համոզմանն եմ, որ Եվրոպական ինստիտուտների կողմից հնչող նման հայտարարությունները, նման կոչերը գռոշի արժեք չունեն, հաշվի առնելով այն խայտառակ լռությունը, որ տիրում էր շատ ավելի լուրջ խախտումների պարագայում պատերազմի ժամանակ, երբ բազմաթիվ տեսանյութերով պարզապես գլխատում և ստորացնում էին հայ զինվորականներին և քաղաքացիական անձանց։ Ես որևէ լուրջ ակնկալիք չունեմ այս միջամտությունից։
—Ռուսական պատվիրակությունը դեմ ու ձեռնպահ քվեարկեց հայ գերիների հարցը ԵԽԽՎ նիստի օրակարգ ընդգրկելու հարցին։ Ռուս պատվիրակներից մեկն ասում է, որ տեխնիկական խնդիր է եղել։ Ձեր կարժիքով` իսկապես եղել է տեխնիկական խնդիր, թե ռուս պատվիրակությունը իրականում դեմ է եղել հայ գերիների հարցը ԵԽԽՎ օրակարգում ընդգրկելու հարցին։
— Հաշվի առնելով այն հանգամանքը, որ ԵԽ-ն իրեն Ռուսաստանի նկատմամբ թշնամական է պահում, Ռուսաստանի նման վարքագիծը ինչ-որ առումով կարող է հասկանալի լինել։ Եվրոպական քաղաքական ինստիտուտները վերջնականապես կորցրել են իրենց վստահությունը հենց պատերազմի օրերից, երբ չդատապարտեցին այդ ագրեսիան և մարդու իրավունքների դեմ ծանրագույն խախտումները։
—Ռուս քաղաքագետ Դուգինը ասում է, որ Մոսկվան կատարեց իր խոստումը, օգնեց Ադրբեջանին վերադարձնել Ղարաբաղը. հերթը Բաքվինն է՝ միանալ ՀԱՊԿ-ին ու ԵԱՏՄ-ին: Մյուս կողմից՝ այսօր ԵԱՏՄ երկրները քննարկել են Ադրբեջանի պատվիրակության հնարավոր մասնակցությունը ԵԱՏՄ միջկառավարական խորհրդի նիստին: Ինչպե՞ս եք գնահատում:
— Ես չեմ հավատում, որ Դուգինի հայտարարությունը իրականությանը համապատասխանում է։ Հետո ես տեսնում եմ, որ Հայաստանում որոշակի շրջանակներ ուզում են հակառուսականություն տարածել և մենք այս պահին այլ տարբերակ չունենք կամ մենք Ռուսաստանի հետ ենք կամ էլ Թուրքիայի, երրորդ տարբերակ ես այս պահին չեմ տեսնում և այդ տեսանկյունից մենք պարտավոր ենք շատ ավելի զգոն լինել նման հայտարարությունները` հայկական մեդիադաշտում տարածելու հարցում։ Ես կարծում եմ, որ Դուգինը ներկայացրել է իր անձնական մոտեցումը, ոչ թե Ռուսաստանի մոտեցումը։
Սոնա Գիշյան
