Լուսավոր Հայաստանի նկատմամբ խաչակրաց արշավանքներ է սկսվել
ՎԵՐԼՈՒԾՈՒԹՅՈՒՆՆԵՐ
Մինչև իշխանությունը զավթելը և դրանից հետո էլ, Նիկոլ Փաշինյանի, թերևս, ամենամեծ ցանկություններից մեկն այն էր, որ «կուլ տա» Լուսավոր Հայաստան կուսակցությանը, այսպես ասած ստիպի Էդմոն Մարուքյանին «անցնել իր թրի տակով»։ Դա Նիկոլին չի հաջողվում, կարծում եմ, երբեք էլ չի հաջողվի։ Դա է պատճառը, որ այս վերջին երեք տարիներին իշխանությունների կողմից Ազգային ժողովում ամենաշատ հարձակման ենթարկվել է ԼՀԿ-ն։ ԱԺ նիստերից տպավորություն է ստեղծվում, թե իշխանական խմբակցությունը, որին հաճախ անձամբ միանում է Նիկոլը, խաչակրաց արշավանք է սկսել Լուսավորի պատգամավորների վրա։ Դե իսկ ֆեյքերի ֆաբրիկաների հարձակումների մասին չխոսենք։ Իշխանությունները Էդմոն Մարուքյանին հնազանդեցնելու համար բոլոր հնարավոր միջոցների դիմել են՝ ԱԺ-ում խմբակային բռնություն կիրառելուց մինչև այդ ուժին տարբեր մարդկանց հետ կապելու, այդով վարկաբեկելու փորձերը։ Թերևս միայն շինծու քրեական գործեր չեն կարել կամ ձերբակալել։ Դա էլ չեն արել, քանի որ Լուսավորում չկա մեկը, ում նկատմամբ քրեական գործ հարուցելը չէր առաջացնի հասարակության ծիծաղը։ Դա զավեշտ կլիներ։ Ինչևէ, հետաքրքիր, բայց նաև օրինաչափ է, որ բացի «ուսապարկերի» խմբակցությունից Լուսավորը հարձակման է ենթարկվում նաև քաղաքական դաշտի հակառակ բևեռներից։
Օրինաչափ է այն առումով, որ թե մի, թե մյուս կողմերը չեն կարողանում այս կուսակցությանը ներքաշել իրենց օրակարգի մեջ քաղաքական լեզվով ասած, կամ այլ խոսքով՝ կոնտրոլի տակ պահեն՝ իրենց օրակարգերը սպասարկելու համար։ Այդուհանդերձ, Լուսավոր Հայաստանը վերջին օրերին կրկին թիրախում է ոչ միայն այն մարդկանց կողմից, որոնց պատճառով երկիրն այս ողբալի վիճակում է, այլև այն մարդկանց կողմից, որոնք Նիկոլին «ծնեցին, սնեցին ու փաթաթեցին» հայ ժողովրդի վզին։ Թե՛ Նիկոլը, թե՛ մյուսները հրաշալի հասկանում են, որ Էդմոն Մարուքյանին հասարակությունը կարող է դիտարկել իրենց բոլորին այլընտրանք ու քվեարկել նրա օգտին։ Իսկ դրա համար առնվազն գոնե 2 պատճառ կա։ Առաջինը՝ Մարուքյանն ու իր թիմը ոչ միայն պառլամենտում, երկրի ներսում, այլև միջազգային կազմակերպություններում իսկապես արդյունավետ աշխատում են, և դա մարդիկ տեսնում և գնահատում են։ Երկրորդ՝ Լուսավորի և ոչ մի պատգամավոր թաթախված չի եղել և չէ կոռուպցիայի, կաշառակերության և տարատեսակ աղմկահարույց գործերի մեջ, ինչն այս կուսակցության շուրջ դրական իմիջ է ստեղծել։
Ի դեպ, ինչ վերաբերում է միջազգային կազմակերպություններում Հայաստանը, հայ ժողովրդի շահերը ներկայացնելուն, ապա սրա համար Մարուքյանին ուղղված քննադատությունն առավել քան մերկապարանոց է։ Մարդը թեկուզ մենակ, բայց ինչ կարողանում անում է։ Տեղին է ասել՝ կարո՞ղ եք ավելին, արեք, ո՞վ էր ձեզ խանգարում, կամ ո՞վ է խանգարում։ Ամփոփենք. առաջիկա խորհրդարանական ընտրություններում ԼՀԿ-ն հավակնում է բարձր ցուցանիշների, դա ակնհայտ դարձավ նաև այդ կուսակցության վերջին մարզային այցելությունների ֆոնին։ Դա բնականաբար չէր կարող չանհանգստացնել թե՛ իշխանություններին, թե՛ ընդդիմադիր որոշ ուժերին։ Եվ այս խաչակրաց արշավանքները ամբողջությամբ տեղավորվում են այս իրողությունների ծիրում։
Կարեն Դանիելյան
