Ապագա, անշուշտ, կա, բայց այդ ապագայում դուք ապագա չունեք
ՎԵՐԼՈՒԾՈՒԹՅՈՒՆՆԵՐ
Ադրբեջանի հոգեխանգարված բռնապետի ամենօրյա ծաղրանքներին ու նվաստացումներին իշխանություն կրող անձը նրան պատասխանում է բանաստեղծություն ձոնելով։ Սա է մեր երկրի ղեկավարի պատասխանը, ուրիշ ոչինչ։ Ալիևը ֆաշիստական փաթեթավորմամբ պուրակներ է բացում, Երևանն ու Սյունիքը ադրբեջանական պատմական տարածքներ համարում, հայ գերիներին չի վերադարձնում՝ համարելով ռազմական հանցագործներ, իսկ Նիկոլը...։ Ի՞նչ անի խեղճ Նիկոլը, մարդը հո՞ չի ճղվի մեջտեղից, սաղ նախկիններն են մեղավոր, ինքը ոչ մի բանի հետ կապ չունի։ Բայց դուք շարունակեք չկասկածել նրա՝ գերագույն գլխավոր հրամանատարի ունակությունների վրա, ավելին՝ չշշկռեք, ինչպես ասում էր Արարատ Միրզոյանը։ Բա գիտեք վարչապետը մա՞րտ է վարում, ոչ, նա մոդերատոր է, ընդամենը լսել է, թե ոնց են գեներալները օպերացիա պլանավորում, որի արդյունքում հարյուրավոր զինվորներ են զոհվում։
Ասում է՝ Արցախն ապագա ունի։ Իսկ ե՞րբ եք բարեհաճելու գնալ Արցախ։ Հա, երևի Ալիևը թույլ չի տալիս։ Բա ո՞նց եք կառուցելու այդ ապագան, հեռվի՞ց, հեռակառավարման վահանակո՞վ, կախարդական փայտիկո՞վ, էն, որ գտել էիր ու ԱԺ-ում հպարտ ու դուխով հայտարարում էիր։ Ասում է Հայաստանն ունի ապագա։ Եվ սա ասում է մի մարդ, ով ավերակ է դարձրել երկիրը, քանդել է բոլոր պետական ինստիտուտները, մի ողջ սերունդ տարել կոտորել է։ Սա ասում է մի մարդ, ով մինչև հիմա պաշտոնապես չի հայտարարել զոհերի, վիրավորների և անհետ կորածների թիվը։ Սա ասում է մի մարդ, ով մի քանի օր առաջ գյուղերից մեկում ասում էր, որ մեր զոհերի թիվը չի անցնում 3250-ը, երեկ ասում էր 4000 պլյուս-մինուս 50։
Հասկանում եք՝ երկրի ղեկավարը նախ օրը մեջ իրեն հակասում և ստում է, ստույգ թիվ չասելով, և որ սարսափելին է՝ պլյուս-մինուսով է հաշվում զոհված զինծառայողներին։ Սա աղետ է բոլոր իմաստներով։ Ինչևէ, հայ ժողովուրդն իր պատմության ընթացքում տեսել է բազմաթիվ արհավիրքներ, զրվել հայրենիքից, կոտորվել, բայց միշտ հառնել է մոխիրներից։ Այս անգամ ևս, կարծում եմ, մենք վերածնունդ կապրենք, բայց մի դետալ Նիկոլն ու իր «ուսապարկերի» թիմը չեն հաշվարկել։ Հայաստանն ու Արցախն, այո, ունեն ապագա, բայց այդ ապագայում այդ մարդիկ ապագա չունեն։ Հակառակ դեպքում այդ ապագան չի կարող լինել, որովհետև այլևս պետություն չի լինելու։
Կարեն Դանիելյան
