Որքան դուք լավն եք, այնքան վատն է ձեր անձնականը

Լավ ինչի ենք մենք ապրում, այս հարցը թերևս միայն ես չէի տվել, ես էլ տվեցի ու միայն ես չէի դեմքի լուրջ արտահայտություն ընդունելով ասել՝ էհ ու շարունակել, ես էլ ասեմ՝ էհ..

դե ապրում ենք, որ լինենք հաջողակ ու երջանիկ.. համամիտ եմ մի քիչ ավելի պարզ ու հակիրճ ասացի այն, ինչը ասել են բոլորը, սկսած դեռևս անտիկ դարաշրջանի հույն փիլիսոփաներից մինչև բարձր վարձատրվող հոգեբանները, ժանտախտից մեռնող գրողները, այսօրվա ինտելիգենցիան ու նաև բրիտանացի գիտնականները, էլ ուր առանց իրենց:

Բայց փորձը ցույց է տվել, որ կանայք չեն լինում հաջողակ ու երջանիկ, իրենք լինում են կամ մեկը կամ մյուսը, դե իհարկե բացառությունները հաշվի չառած, ուստի իմացեք ձեր 3 ուժեղ կողմերը, որոնք կփչացնեն ձեր անձանական երջանկությունը:
Ինքնակենսագրության մեջ դրական կողմերի սյունակը լրացնելիս՝ հաջողակ կանայք անպայման կնշեն՝ նպատակասլաց, ինքնավստահ, շփվող և այլն: Բայց հարաբերություններ սկսելիս հիշեք, որ դուք աշխատանքի չեք ընդունվում և այսպես:

1. Դուք նպատակասլաց եք: Ցավում եմ:

Անգամ եթե տղամարդը նշի, թե գնահատում է դա ձեր մեջ, ապա վաղ թե ուշ դա կսկսի նյարդայնացնել: Որովհետև ձեր նպատակը երջանիկ լինելն էր, իր գործը ձեզ երջանկացնելն էր,ուրեմն էլ դեպի ինչ շինծու նպատակներ եք դուք սլանում: Ի վերջո ամուսնություն՝ ինչ, ննջասենյակից խոհանոց եք սլանալու այնտեղից էլ թռիչքաձև, կազմակերպված պատշգամբ լվացք փռելու, թե նպատակասլաց կերպով երեխայի դունչիկն եք մաքրելու, ի՞նչ, մինչև ո՞ւր: Կանացի երջանկություն գաղափարի մեջ ոչ մի կերպ չեն ամփոփվում կարիերիստ ու նպատակասլաց բառերը: Դուք չեք կարողանա խաղալ նվիրված ընտանիքի մայր ու միևնույն ժամանակ լինել կին-բոս, որի վրա հենվում է մի ամբողջ կազմակերպություն: Դրա համար կան այլ տարբերակներ ու խորամանկություններ, որի մասին կգրեմ մյուս հոդվածներում:

2. Դուք ինքնավստահ եք:

Ինքնավստահ կինը գիտի, որ ցանկացած իրավիճակից լուծում կա, գիտի սեփական արժեքն ու հնարավորությունները և ի վերջո շատ քիչ է զգում որևէ մեկի կարիքը: Ես՝ ինքս: Ահա հենց սա է գրված նմանց կանաց ձեռքում հպարտ ծածանվող դրոշին:
Իսկ ի՞նչ եք առաջարկում անի նա: Ո՞ւմ օգնի, ո՞ւմ առաջնորդի ու ի վերջո ո՞ւմ հետ խաղա: Զրուցեք, խորհրդակցեք և հարցրեք նրա կարծիքը, թույլ տվեք, որ ինքը անի, այն ինչը գուցե դուք էլ հեշտությամբ կարող էիք անել: Եվ հետո ավելորդ անգամ հաճոյախոսություն լսելը դեռ ոչ մի կնոջ չի խանգարել:

3. Շփվող եք:

Նախ հասկանալ է պետք ինչի կամ ում հետ և ինչպես եք դուք շփվում: Հեշտ մտերմություն ձեռք բերելու հատկությունը կարող է օգնել աշխատանքային դիրքը առաջ մղելու համար, բայց սա նաև ենթադրում է անվերահսկելի քանակության և որակի անձանց բազմություն ձեր մեսիջ-լիսթում: Եվ սահուն կերպով ձեր սիրային հանդիպումները գնալով ավելի հաճախ կփոխարինվեն գործնական հանդիպումներով, իսկ գործնականները, ով գիտի թե ինչի, իսկ սա խուճապի առիթ է:

Եվ ի վերջո, եթե որևէ կերպ չկարողանաք թաքցնել ձեր դրական կողմերը, ձեզ մնում է խոստովանել և ուղղվել կամ էլ ուշաթափվել, 18-րդ դարի հայտնի խորամանկ կանայք հենց այդպես էին հարթում խնդիրները: Իսկ իրականում ճիշտ տղամարդու կողքին դուք անգամ չեք մտածի այս ամենի մասին:
Հ.Գ Կին լինելը բարդ, բայց ուժեղ խաղաքարտ է:

Արմինե Ճաղարյան