Հոնկոնգյան գրիպը հասե՞լ է Հայաստան
ԱՄԵՆԱԸՆԹԵՐՑՎԱԾ
երջին 10-15 օրերին Հայաստանում A տիպի H3 ենթատեսակի վիրուսի շտամ է արձանագրվել: Մինչ այդ Հայաստանում գրիպի վիրուս չի բացահայտվել: Այսօր կայացած մամուլի ասուլիսում այս մասին տեղեկացրեց ՀՀ առողջապահության նախարարության Հիվանդությունների վերահսկման եւ կանխարգելման ազգային կենտրոնի գլխավոր տնօրեն Արտավազդ Վանյանը:
Նրա խոսքով՝ գրիպի վիրուսի այլ ենթատեսակներ Հայաստանում այս պահին չեն գրանցվել:
Նա նշեց, որ վերջին 10 օրերին ոչ կտրուկ, բայց հիվանդացության ակտիվացում է նկատվում 0-14 տարեկան երեխաների շրջանում, եւ սա կապված է այն հանգամանքի հետ, որ աշնանային արձակուրդից հետո դպրոցներում դասերը սկսվել են:
Արտավազդ Վանյանը հավելեց, որ ներկայում գրիպի բռնկում կամ համաճարակ չկա, համաճարակային շեմի մեկանգամյա գերազանցում է արձանագրվել: Շեմի գերազանցում առավելապես նկատվում է 0-5 տարեկանների տարիքային խմբում, որոնց հետեւում է 5-14 տարեկանների խումբը, այնուհետեւ՝ 26-36 տարեկաններինը: 65 տարեկանից բարձր տարիքային խմբում ամենացածր ցուցանիշներն են: Այսպիսին են դպրոցական եւ նախադպրոցական հաստատություններում, ինչպես նաեւ առաջնային օղակի հաստատություններում եւ հիվանդանոցներում Կենտրոնի անցկացրած մոնիթորինգի արդյունքները:
Կենտրոնի ղեկավարի խոսքով՝ Հայաստանում եւ ամբողջ եվրոպական տարածաշրջանում այսօր իրավիճակը համապատասխանում է տարվա այս եղանակի օրինաչափ ընթացքին: ԱՀԿ-ի տվյալներով՝ եվրոպական տարածաշրջանում հիմնականում տարածված է A տիպի H3 ենթատեսակի վիրուսը, որը գրանցվել է բոլոր հետազոտված դեպքերի 3.6%-ի պարագայում:
Ռուսաստանում եւ Վրաստանում գրեթե նույն իրավիճակն է: Վրաստանի գործընկերներից Կենտրոնի ստացած տվյալների համաձայն՝ հարեւան երկրում նույնպես երեխաների շրջանում հիվանդացության ակտիվացում է նկատվել:
Նշենք, որ Ռուսաստանում, Ռոսպոտրեբնադզորի տվյալներով, 11 շրջաններում գրիպի AH3N2 վիրուս է բացահայտվել. սա, այսպես կոչված, հոնկոնգյան գրիպն է: Մեկ ամիս առաջ ՀՀ ԱՆ Հիվանդությունների վերահսկման եւ կանխարգելման ազգային կենտրոնի հատուկ վտանգավոր եւ օդակաթիլային վարակների համաճարակաբանության բաժնի պետ Լիանա Թորոսյանը տեղեկացրել էր, որ Հայաստանում գրիպի, մասնավորապես՝ հոնկոնգյան գրիպի վիրուսներ չեն գրանցվել, բայց այն կարող է Ռուսաստանից հետո մեկ ամիս անց Հայաստան հասնել:
Արտավազդ Վանյանի խոսքով՝ Հայաստանում բռնկում սպասվում է դեկտեմբերի վերջին, երբ աշխատանքային միգրանտները սկսում են ամանորյա տոների նախաշեմին տուն վերադառնալ:
