Խնձորեսկն ու Քարահունջն էլ կընդգրկվեն սահմանամերձ բնակավայրերի ցանկում

ՀՀ աշխատանքի և սոցիալական հարցերի փոխնախարար Դավիթ Խաչատրյանն այսօր հրավիրված ասուլիսում հայտարարեց, որ Սյունիքի մարզի Խնձորեսկ և Քարահունջ համայնքներն ամենայն հավանականությամբ կընդգրկվեն սահմանամերձ բնակավայրերի ցանկում։

Նախարարությունը քննարկում է նաև Ակներ և Վերնիշեն համայքների ներառումը ցանկում։ Այդ դեպքում այս համայքները նույնպես սոցիալական աջակցություն կստանան կառավարությունից։

Արձագանքելով Կապան քաղաքը սահմանամերձ բնակավայր ճանաչելու հարցին՝ նախարարն ասաց, որ ցանկում ներառվել են բացառապես գյուղական բնակավայրերը, իսկ Կապանը քաղաք է։

Հիշեցնենք` ՀՀ կառավարության որոշմամբ հաստատվել է սոցիալական աջակցություն ստացող սահմանամերձ համայնքների ցանկը, ըստ որի` սոցիալական աջակցություն կստանան 77 բնակավայր։

Ցուցակում բացակայում են Խնձորեսկ և Քարահունջ բնակավայրերերը, և այդ փաստը բազմաթիվ դժգոհությունների պատճառ էր դարձել։ Մասնավորապես Խնձորեսկի գյուղապետ Երվանդ Մալունցը գրել էր, որ կառավարությունում գյուղի իրավիճակից տեղյակ չեն և չգիտեն, որ խնձորեսկցին իր սեփական դաշտում սեզոնային աշխատանքներ իրականացնելու հնարավորություն այլևս չունի։