Դասական ցինիզմ
ՎԵՐԼՈՒԾՈՒԹՅՈՒՆՆԵՐ
Անապացուցելի է այն հանգամանքը, որ կառավարման ժողովրդավարական համակարգի կարևորագույն սկզբունքներից երկուսը թափանցիկությունն ու որոշումների կայացմանը քաղաքացիների մասնակցությունն են: Նախկինում ընդդիմադիր խմբագիր և ԱԺ ընդդիմադիր պատգամավոր Նիկոլ Փաշինյանը քննադատում էր գործող իշխանություններին ոչ թափանցիկ աշխատաոճի համար: 2018-ի ապրիլյան իրադարձությունների շնորհիվ վարչապետ կարգվելով՝ սույն անձը ՀՀ «հպարտ» քաղաքացիներին խոստանում էր կառավարման սկզբունք դարձնել ժողովրդավարության վերը նշված սկզբունքները: Եվ ՀՀ «հպարտ» քաղաքացիներն իրենց պատկերացնում էին երկրի իսկական տերեր՝ անգամ վարչապետներ, ինչպես նրանց համոզել էր Փաշինյանը: Եվ այդ պատկերացումը դիմացավ բավականին երկար՝ վարչապետի աթոռը զբաղեցնող անձի որդեգրած աշխատաոճի՝ պոպուլիզմի շնորհիվ:
Իրականում, ՀՀ քաղաքացին նախկինների օրոք այդքան հեռացված չէր եղել երկրի կառավարումից, որքան Նիկոլի վարչապետության ժամանակ: Թափանցիկությունը ևս այն սկզբունքը չէր, որով կարող էր իրականում գլուխ գովել «թավշյա» հեղափոխականների կառավարությունը: Նիկոլին պաշտող կամ նրան դեռեւս վստահող հանրույթի համար պարզ երկնքում պայթած որոտի նմանվեց վերջինիս կողմից հասարակությունից գաղտնի կապիտուլյացիոն եռակողմ հայտարարության ստորագրումը:
Ըստ էության, գիտակից հայաստանյան հասարակությունը և սփյուռքը մեկ ուրիշ ցնցում ապրեցին, երբ հայտնի դարձավ, որ պատերազմի օրերին համահայկական «Հայաստան» հիմնադրամում ողջ հայության ջանքերով հավաքված 170 միլիոն ԱՄՆ դոլարից շուրջ 53 միլիարդ դրամ կամ ողջ գումարի շուրջ 60 տոկոսը հատկացվել է կառավարությանը: Իսկ ԱԺ-կառավարություն վերջին հարցուպատասխանի ժամանակ պարզվեց, որ նախորդ տարվա հոկտեմբեր-նոյեմբեր ամիսներին պետբյուջե են փոխանցվել հիմնադրամի մնացած միջոցները: Սա դասական ցինիզմից բացի՝ այլ բնորոշում չունի։ Փաստորեն, արձանագրելով հիմնադրամի միջոցների շուրջ 60 տոկոսի փոխանցման նկատմամբ հայության բացասական արձագանքը՝ մնացած մասը փոխանցվել է գաղտնիության պայմաններում: Եվ զարմանալի է, որ փոխվարչապետը հիշատակել է այդ երևույթի մասին՝ կարող էր անտեղյակ ձևանալ, ինչը բնորոշ է «թավշյա» հեղափոխականների իշխանությանը: Կարող ենք ենթադրել, որ, չնայած Նիկոլի և նմանների հետ ամենօրյա շփումներին, Գրիգորյանը դեռևս պահպանել է ազնվությունը: Ցավալի է, սակայն փաստ. ժողովրդի ուսերի վրայով գալով իշխանության՝ Փաշինյանը ոտնատակ տվեց բոլոր հնարավոր արժեքները:
Անդրանիկ Կիրակոսյան
