Կեր, խմի, քեֆ արա շարունակ, աշխարհը խալի է ոտքիդ տակ
ՎԵՐԼՈՒԾՈՒԹՅՈՒՆՆԵՐ
Պետական բարձրաստիճան պաշտոնյաների համար զբաղեցրած աթոռը նաև շրջագայելու, ճոխ գնումներ անելու և առհասարակ տարբերվող կյանքով ապրելու հնարավորություն է: Հայաստանում դրանից չեն խորշում օգտվել: Ավելին՝ նույնիսկ մի տեսակ ամոթ է հնարավորությունը ձեռքիցդ բաց թողես, քանի որ հավերժ պատգամավոր կամ նախարար չես աշխատելու: Սա ավելի ցցուն ու տգեղ դրսևորում է ստանում, երբ պաշտոնի է նշանակվում հոգով գյոռմամիշը: Մարդը կարող է աղքատ կյանքով ապրած լինի, բայց աչքածակ, ագահ ու գյոռմամիշ չլինի: Պաշտոնի նշանակվելուց հետո էլ, ապրի համեստ ու հասարակ: Ինչևէ, հիմա հասկանանք` ինչ միջոցների հաշվին է անընդհատ շրջագայում ու ճոխ գնումներ անում Նիկոլ Փաշինյանի տիկին` Աննա Հակոբյանը:
Նախ պետք է ընդգծենք, որ հեղափոխության առաջնորդի տիկինն առաջինն ինքը պետք է օրինակ ծառայեր մյուսների համար համեստ ու հասարակ կյանքով ապրելու հարցում: Բայց պատերազմում պարտված երկրի ղեկավարի կինը, ընտանիքի անդամները ճոխ ծախսեր են անում, շրջագայություններ են կազմակերպում տարբեր երկրներ, բայց հանրությանը չի իրազեկվում, թե ում հաշվին: Լրատվամիջոցներին Աննա Հակոբյանի գրասենյակից և կառավարությունից այս հարցերի պատասխանը ստանալ չի հաջողվում, պարզապես չի հաջողվում:
Լավ, Նիկոլ Փաշինյանը առիթը բաց չի թողնում հայտարարելու, որ ապրում է «չոր» աշխատավարձով: Այդ դեպքում ո՞վ պետք է բացատրի այս հանելուկը՝ նրա ընտանիքի անդամներն ի՞նչ միջոցների հաշվին են հսկայական գումարներ ծախսում ինքնաթիռի տոմսեր ձեռք բերելու, հյուրանոցներ վարձելու, ուղևորությունների հետ կապված գերթանկարժեք այլ ծառայություններ պատվիրելու համար: Տրամաբանական է, եթե պետական պաշտոնյա ես, ապրում ես աշխատավարձով, դու չես կարող նման ծախսեր քեզ թույլ տալ:
Եկեք արձանագրենք, որ խոսքը ամենևին չի վերաբերում պետական բյուջեի միջոցների մասին, որոնք օրենքով նախատեսված են երկրի վարչապետի արտասահմանյան այցելություններին: Խնդիրը պարզ է՝ բյուջեով նախատեսված չէ Աննա Հակոբյանի շրջագայությունների ու գնումների համար ֆինանսական միջոցներ: Հանրությանը դա է հետաքրքիր ու քանի դեռ հստակ բացատրություն չկա, թե որտեղից են այդ միջոցները, մնում է մտածել, որ Նիկոլը պարզապես ստում է «չոր» աշխատավարձով ապրելու մասին:
Անի Առաքելյան
