Հեռացիր, գնա, որ Հայաստանն ու Արցախը մնան, լինեն...
ՎԵՐԼՈՒԾՈՒԹՅՈՒՆՆԵՐ
Պատերազմից հետո, նոյեմբերի 18-ին Նիկոլ Փաշինյանը ներկայացրեց առաջիկայում անելիքների ճանապարհային քարտեզը: Նա գրել էր, թե եկել է ժամանակը խոսելու ստեղծված վիճակը հաղթահարելու ուղիների, մեթոդների և ծրագրերի մասին: Ստորև ներկայացնենք, թե ինչ կետեր էր ներկայացնում Նիկոլ Փաշինյանը ու ինչ է արել այս 3 ամսվա ընթացքում:
Ուշադիր կարդացեք բոլոր 15 կետերը, որովհետև վերջում պիտի խղճով պատասխանենք մեկ պարզ հարցի՝ այս կետերից ո՞րն է կատարել Նիկոլ Փաշինյանը: Այսպես.
1.Ղարաբաղի հարցի բանակցային գործընթացի վերականգնում ԵԱՀԿ ՄԽ համանախագահության ձեւաչափով՝ Արցախի կարգավիճակի և իրենց բնակության վայրեր արցախցիների վերադարձի հարցի առաջնահերթության ընգծմամբ:
2. Ապահովել արցախցիների վերադարձը իրենց հայրենի օջախներ: Ամբողջությամբ վերականգնել Արցախի բնականոն կյանքը: ԼՂ իշխանությունների վերահսկողության տակ գտնվող տարածքների վնասված տների, բնակարանների և ենթակառուցվածքների վերականգնում:
3. Զոհված զինծառայողների և քաղաքացիների ընտանիքների սոցիալական երաշխիքների ապահովում:
4. Պատերազմական գործողությունների ընթացքում ՀՀ տարածքում տուժած բնակելի և հանրային կառույցների և ենթակառուցվածքների վերականգնում:
5. Հաշմանդամություն ստացած զինծառայողների սոցիալական երաշխիքների, պրոթեզավորման գործընթացի և մասնագիտական վերապատրաստման ապահովում:
6. Գերեվարված զինվորականների և քաղաքացիական անձանց շուտափույթ վերադարձ: Նրանց ընտանիքների սոցիալական երաշխիքների ապահովում: Անհետ կորածների ճակատագրերի շուտափույթ պարզաբանում: Նրանց ընտանիքների սոցիալական երաշխիքների ապահովում:
7. Պատերազմին մասնակցած անձանց և ընդհանուր առմամբ հանրության հոգեբանական ռեաբիլիտացիայի համակարգի ձեւավորում:
8. Զինված ուժերի բարեփոխումների ծրագրի հաստատում և բարեփոխումների մեկնարկ:
9. Կորոնավիրուսի համավարակի հաղթահարում և դրա հետեւանքների վերացում:
10. Տնտեսական ակտիվության միջավայրի վերականգնում:
11. Ժողովրդագրական խնդիրների լուծման ծրագրերի ակտիվացում:
12. Ընտրական օրենսգրքի փոփոխությունների և կուսակցությունների մասին նոր օրենքի ընդունում:
13. Մասնագիտացված դատավորների ինստիտուտի ներդրում՝ որպես հակակոռուպցիոն դատարանի ստեղծման առաջին քայլ: Ապօրինի գույքի բռնագանձման օրենքի կիրարկման մեկնարկ:
14. Հայաստանյան քաղաքական և քաղաքացիական համայնքի ներկայացուցիչների հետ մշտական թեմատիկ կոնսուլտացիաների անցկացում:
15. Սփյուռքի հայկական կառույցների և առանձին անհատների հետ մշտական թեմատիկ կոնսուլտացիաների անցկացում: Հայաստանյան և սփյուռքի առանձին անհատների և կառույցների ներգրավում վերոնշյալ գործընթացների մեջ:
Կարճ ամփոփենք: Նոյեմբերի 18-ից անցել է գրեթե 3 ամիս: ՀՀ վարչապետի աթոռին նստած անձն իր իսկ կողմից հրապարակված կետերից և ոչ մեկը չի իրականացրել: Ավելին՝ ՀՀ վարչապետի աթոռը զբաղեցնող անձի անգործության պատճառով ամեն օր Հայաստանը կրում է վնասներ ու նորանոր կորուստներ: Պաթոլոգիկ ստախոսին բնորոշ վարքագծով մարդն ամեն օր նորանոր <<լապշաներ է կախում ՀՀ քաղաքացիների ականջներից>>: Այո, մեծ հաշվով ոչ թե առաջնահերթ պետք է նոր ընտրություններ տեղի ունենան, այլև Նիկոլ Փաշինյանը ժամ առաջ պիտի հրաժարական տա, որպեսզի այլևս Հայաստանն ու Արցախը մնան, լինեն:
Կարեն Դանիելյան
