Ծանոթ ու միաժամանակ անհայտ` կլոր շրջանակով ակնոց
ՀԱՍԱՐԱԿՈՒԹՅՈՒՆ
Կլոր շրջանակներով ակնոցը պատկանում է վինտաժ ոճին: Ներկայումս նման ակնոցը համարվում է ամենանորաձևներից մեկը բոլոր մյուս տիպի ակնոցների մեջ: Անցյալ տարի նորաձևության գրեթե բոլոր ցուցադրությունների ժամանակ մոդելները կրել են այդտիպի ակնոց: Ակնոցի շրջանակը և ապակին պատրաստում են տարբեր գույներից և հաճախ շատ յուրօրինակ և համարձակ համադրություններ են ստացվում: Կլոր շրջանակով ակնոցը շատ հարմար է և սազում է շատերին, բայց այդ դեպքում խնդիրներ են առաջանում չափսի ընտրության հարցում, այնպես որ, ակնոցը փորձելիս պետք չէ շտապել, այլ պետք է լավ տանջել խանութի վաճառողին ու փորձել բոլոր չափերը:
Կլոր շրջանակով ակնոց առաջին անգամ սկսել են կրել դեռ նախորդ դարի 20-ականներին: Այդ ժամանակ հայտնի հումորիստ Հարոդ Լլոյդը կրիայի պատյանից պատրաստված խոշոր շրջանակներով ակնոցին յուրօրինակ փոխարիող գտավ և սկսեց իր ֆիլմերում հայտնվել կլոր շրջանակով ակնոցով: Հենց դա էլ խթան հանդիսացավ նորաձևության մեջ նոր թրենդի ի հայտ գալուն և այդպիսի ակնոց սկսեցին հաճույքով կրել և՛ կանայք, և՛ տղամարդիկ: Սկզբում այդ ակնոցները բավականին մեծ տրամագիծ ու հաստ շրջանակներ ունեին: Այնուհետև գրեթե կես դար հետո տղամարդու կլոր շրջանակով արևային ակնոցին նորաձևության երկրորդ շունչ տվեց լեգենդար Ջոն Լենոնը, որը իր Բիթլզ խմբով դարձավ հիպպիների դարաջրջանի ՌոկենՌոլի-ի դեմքը:
Բնական է, որ բրիտանացի արտիստի շատ երկրպագուներ (երիտասարդ և ավագ տարիքի) ձգտելով ավելի նմանվել իրենց կուռքին, սկսեցին կրել կլոր շրջանակով ակնոց: Կլոր դարձրեցին ոչ միայն արևապաշտպան ակնոցը, այլ նաև օպտիկականը: Ներկայումս նման ակնոցը նորաձևություն վերադարձնող հերթական աստղ է դարձել փոքրիկ հրաշագործ Հարրի Փոթերը: Նրա օրինակով ամբողջ աշխարհի դպրոցական աղջիկներն ու պատանիները կլոր ակնոց են սկսել կրել: Ըստ շրջանակի ձևի՝ հետաքրքիր փաստ են արձանագրել որոշ հետազատողներ: Նրանք գտնում են, որ կլոր շրջանակով արևային ակնոց նախընտում են ռոմանտիկ և ուրախ մարդիկ, որոնք ձգտում են անկեղծ սիրո: Իսկ հենց այդպիսի ակնոցի սիրահարները պնդում են, որ երբ իրենք կրում են այն, զգալիորեն բարձրանում է իրենց տրամադրությունը և ինքնավստահությունը: Արդեն միայն այս դրական հատկանիշները բավական են, որպեսզի ձեռք բերեք այն, եթե մինչ այդ ինչ-ինչ պատճառներով չունեիք:
Նյութը հրապարակման պատրաստեց Կամո Խաչիկյանը
